Pavlodarda kóktaıǵaq saldarynan qııar men qyzanaq qymbattady
ASTANA. QazAqparat - Pavlodar qalasyndaǵy áleýmettik dúkenderge kóktaıǵaqtyń saldarynan kókónis jetkizilmeı qalýyna baılanysty keı jerlerde baǵa 10 paıyzdan artyq ósken, dep habarlaıdy pavlodarnews.kz .
Búgin qalalyq máslıhattyń depýtaty Qobylanbek Qojın men kásipkerlik jáne aýyl sharýashylyq bóliminiń sektor meńgerýshisi Arman Asıpov áleýmettik dúkenderdegi kúndelikti baǵa monıtorıngin jasady.
«Qazirgi tańda baǵa ósimi joq. Turaqtandyrý qorynda 20 tonna aqsýlyq qııar men ekibastuzdyq qyzanaq bar. Kóktaıǵaq oryn alyp, joldardyń jabylýy saldarynan búgin taýar jetkizilmedi. Sol sebepti, keıbir áleýmettik dúkenderde baǵa ósimi baıqaldy. Biraq kókónister jetkizilgen soń jergilikti qııardyń bir kelisi 660 teńge bolsa, qyzanaqtyń kelisi 605 teńgeden aspaıdy», - deıdi qalalyq kásipkerlik jáne aýyl sharýashylyq bóliminiń sektor meńgerýshisi Arman Asıpov..
Jalpy, Pavlodarda negizsiz baǵa kótergen dúkender joq. Mundaı jaǵdaı anyqtalsa, «áleýmettik» mártebesinen aıyrylady.
Aıta keteıik, tekseris kezinde satyp alýshylardyń biri «Kýtýzovskıı» áleýmettik dúkeninde satýshynyń jumyrtqa baǵasyn 230-dan 210 teńgege ózgertkenin baıqaǵan.
Qalalyq máslıhattyń depýtaty Qobylanbek Qojın aldaǵy ýaqytta máseleniń mán-jaıyn anyqtap, kásipkerlik bólimimen negizsiz baǵany ózgertken satýshylardy jaýapqa tartatynyn aıtty.
