Pavlodarda qoqysty zańsyz úıgenderge 4,8 mln teńge aıyppul salyndy
PAVLODAR. KAZINFORM — Óńirde jyl basynan beri turmystyq jáne qurylys qaldyqtary tógilgen júzden astam zańsyz qoqys orny anyqtalǵan. Zań buzýshylar jalpy somasy 4,8 mln teńge kóleminde aıyppul arqalaǵan.
Ekologter zańsyz qoqys úıindilerin reıdtik sharalarmen qatar ǵaryshtyq monıtorıng arqyly da anyqtaıdy.
Pavlodar oblysy boıynsha ekologııa departamenti basshysynyń orynbasary Áset Syzdyqovtyń aıtýynsha, mundaı oryndardyń paıda bolýyna kóbine qaldyqtardy arnaıy polıgonǵa jetkizbeı, belgilenbegen jerge tógetin jeke kásipkerler sebep bolady.
— Óńirde turmystyq qaldyqtardy jınaýǵa arnalǵan 321 nysan bar. Onyń tek úsheýi belgilengen talaptarǵa sáıkes keledi. Zańsyz qoqys úıindileri jıi paıda bolatyn aýmaqtarǵa beınebaqylaý kameralary ornatylǵan. Máseleni sheshý úshin tórt eldi mekende jańa polıgon salýǵa jobalyq-smetalyq qujattama ázirlendi. Sonymen qatar oblysta jylyna 150 myń tonnaǵa deıin qaldyq qabyldaı alatyn qoqys suryptaý ortalyǵy jumys isteıdi, — deıdi departament ókili.
Departament aqparynsha, zańsyz qoqys tókken jeke tulǵalarǵa shamamen 100 AEK mólsherinde aıyppul salynady. Quqyqbuzýshylyq qaıtalansa, aıyppul 200 AEK-ke deıin ulǵaıady. Sonymen qatar zańsyz áreketke paıdalanylǵan kólik nemese ózge de múlik tárkilenýi múmkin.
Eske sala keteıik, SQO-daǵy Beskól mańyndaǵy ormandarda qoqys úıindileri paıda bolǵan.
