Pavlodarda qoqysty suryptap jınaǵan turǵyndar kommýnaldyq qyzmetke az tóleýi múmkin
PAVLODAR. KAZINFORM - Pavlodar oblysynyń ákimi Asaıyn Baıhanovtyń sózinshe, bul úshin eń áýeli jergilikti eńbek uıymdarynda qoqysty suryptap jınaý ádisi engiziledi. Odan soń birtindep qoqysty turmystyq jaǵdaıda suryptap laqtyrýǵa kóńil bólinbek.
Pavlodardan jylyna 150 myń tonnadaı turmystyq qaldyq shyǵady. Ony suryptap, óńdeıtin zaýyt taıaý ýaqytta salynýy múmkin. Al oǵan deıin turǵyndardy turmystyq qaldyqtardy bólip jınaýǵa daǵdylandyrý kózdelip otyr.
- Úıler mańyndaǵy konteınerler qoqysty suryptap jınaý máselesin sheshpeı otyr. Eń áýeli turmystyq qaldyqty úıde bólekteý jınaý qajet dep oılaımyn. Bizdiń azamattar úılerindegi qoqystyń barlyǵyn bir ǵana ydysta saqtap, sol qalpymen konteınerge aparyp tógedi. Jalpy úıdegi mundaı ydys tórt bólikten tursa, durys bolar edi. Biraq bizde ázirshe mundaı ekologııalyq sana qalyptasqan joq ári ony talap etý de erte. Sondyqtan suryptaýdy aldymen kásiporyndarda, qoǵamdyq tamaqtaný oryndary men ózge de uıymdarda júrgizý kerek. Máselen, olarda shynyǵa, plastıkke, qaǵazǵa, bıologııalyq qaldyqtarǵa arnalǵan konteınerler qoıylǵany durys, - deıdi Pavlodar oblysynyń ákimi Asaıyn Baıhanov.
Ákim óńirde qaldyq óńdeıtin zaýyt salynsa, jyl saıyn tonnalap jınalyp qalatyn qoqystardyń máselesin sheshýge bolady dep esepteıdi. Bıologııalyq qaldyqtardan bıogýmýs shyǵarýǵa bolar edi. Zaýyt oǵan qosa qaldyqtan metaldy, shyny men qaǵazdy bólip alyp shyǵýǵa múmkindik beredi.
Keler jyly oblystaǵy kommertsııalyq kásiporyndar qoqysty suryptap jınaýǵa kirisedi. Áýeli metallýrgııalyq iri kásiporyndar, odan soń qoǵamdyq tamaqtaný oryndary men sýpermarketter, dúkender kóshedi. Sońynan qala turǵyndaryna úıretý kózdelip otyr. Bolashaqta turǵyndardy bul turǵyda yntalandyrý da oıda bar. Máselen, qaldyqty bólek-bólek jınaǵandar qoqysty shyǵarý qyzmetine jeńildikpen tólem jasaýy yqtımal.
Eske sala keteıik, pavlodarlyq ǵalym Qazaqstanda tehnogendi qaldyqtardyń biryńǵaı reestrin qurý týraly bastama kóterdi.