Pavlodarda qoǵamdyq orynda mas júrgen 10 jasóspirim ustaldy
PAVLODAR. QazAqparat – Pavlodarda polıtsııa «Kóktemgi demalys» operatsııasyn ótkizdi, dep habarlaıdy QazAqparat.
«Jasóspirimder arasyndaǵy qylmystyń aldyn alý jáne boldyrmaý úshin 20-30 naýryz aralyǵynda, ıaǵnı kóktemgi demalys kezinde Pavlodar qalasynyń aýmaǵynda «Kóktemgi demalys» jedel-aldyn alý sharasy ótkizildi. Polıtsııa qyzmetkerleri jasóspirimderdiń túngi ýaqytta ata-anasynyń qaraýynsyz júrýin boldyrmaýǵa erekshe kóńil bólgen. Sonyń nátıjesinde túngi ýaqytta kóshede júrgen kámelettik jasqa tolmaǵan 49 bala anyqtaldy. Barlyq ata-anaǵa qatysty QR Ákimshilik quqyqbuzýshylyqtar týraly kodekstiń 442-baby boıynsha ákimshilik óndiris qozǵaldy», - dep habarlady Pavlodar qalasy ıývenaldy polıtsııasynyń aǵa ınspektory Rýslan Súleımenov.
Sondaı-aq, qoǵamdyq orynda mas júrgen taǵy on jasóspirimniń ustalǵanyn atap ótti. Bul úshin olardyń zańdy ókilderine qatysty ákimshilik óndiris qozǵaldy.
«Mysaly, 29 naýryz kúni saǵat 23.20-da Teplov kóshesinde 15 jasar jasóspirim ustaldy. Áńgimelesý barysynda odan ishimdiktiń ıisi shyǵyp turǵan», - dedi aımaqtyq polıtsııa departamentiniń baspasóz qyzmetinen. Onyń anasyna Ákimshilik quqyqbuzýshylyq týraly kodekstiń 440-baby 2-bólimimen ákimshilik hattama toltyryldy.
«Aldyn alý sharasyn ótkizý kezinde Pavlodar qalasynyń polıtseıleri 69 ákimshilik tártip buzýshyny anyqtaǵan. Kámelettik jasqa jetpegen jeti adam men 69 ákimshilik tártip buzýshy baqylaýǵa alyndy», - dedi R.Súleımenov.
