Pavlodarda qoǵamdyq kóliktiń jolaqysyn aqshamen tóleý qymbat bolady
PAVLODAR. QazAqparat – Jańashyldyqty qazan aıynyń sońyna deıin Pavlodar oblysy Kásipkerler kalatasynyń saraptama keńesi men qalanyń qoǵamdyq keńesi birge qarastyrady, dep habarlaıdy QazAqparat tilshisi.
«Qazirgi ýaqytta qala bıligi shegerme aqyly tarıf engizýdi josparlap otyr. Oǵan siıkes, jolaqyny qolma-qol aqshamen tólegende 150 teńge bolady, al aqshasyz tólese sol burynǵy baǵada qalady, ıaǵnı 80 teńgeni quraıdy», - dep habarlady Pavlodar ákimdigi.
Qala ákimdiginiń málimetinshe, bul jańashyldyqty qazan aıynyń sońyna deıin Pavlodar oblysy Kásipkerler palatasynyń saraptama keńesi men oblys ortalyǵynyń qoǵamdyq keńesi birge qarastyrady. Aqparat jarııa talqylaý úshin saıttarǵa ornalastyrylady.
«Oblys ortalyǵynda qoǵamdyq kóliktiń qalalyq marshrýttaryna 7 avtomobıl tasymaldaýshysy men «Pavlodar qalasynyń tramvaı basqarmasy» AQ qyzmet kórsetedi. 32 avtobýs marshrýtynda 400-den astam kólik qyzmet kórsetedi, sondaı-aq kún saıyn jelige 68 tramvaı shyǵady», - dep túsindirdi qalalyq ákimdikte.
2021 jyldyń shilde aıynan bastap barlyq baǵyttarda jol aqysyn tóleýdiń elektrondyq júıesi jumys isteıdi. Qalalyq ákimshilik ókilderiniń aıtýynsha, qazir Pavlodardyń qoǵamdyq kóliginde elektrondy bıletteý júıesiniń 2 operatory jumys isteıdi: «Smart Avtobýs PV» JShS jáne «BPTs Qazaqstan».
«Elektrondyq bıletteýdi engizý sýbsıdııalaýdy qajet etetin baǵyttardy odan ári anyqtaý maqsatynda naqty jolaýshylar aǵynynyń esebin júrgizýge, tegin jáne jeńildetilgen sanattaǵy azamattar saparynyń sanyn esepteýge múmkindik beredi. Sonymen qatar, qolma-qol aqshasyz tólem júıesi tasymaldaýshylar alatyn aqsha aınalymyn ashyq etedi», - dep atap ótti bılik.
