Pavlodarda qoǵamdyq kólikte bir jyl tegin júrýge bolatyn bıletter berile bastady
PAVLODAR. QazAqparat - Pavlodarda jeńildetilgen jol júrý bıletteri berile bastady. Mundaı jeńildikter qoǵamdyq kóliktiń barlyq túrlerinde, sonyń ishinde mıkroavtobýstarda da qoldanylady, dep habarlaıdy Pavlodarnews.kz.
Pavlodar ákimdiginde habarlaǵandaı, uzaq merzimdi tegin jol júrý bıletteri-bir jylǵa oblys ortalyǵy turǵyndarynyń bes sanatyna beriledi:
- tórt jáne odan da kóp birge turatyn kámeletke tolmaǵan balalary bar kóp balaly analar (balalary 18 jasqa tolǵannan keıin oqý oryndaryn bitirgenge deıin, kolledjder men joǵary oqý oryndarynda oqıtyndar);
- ataýly áleýmettik kómek alýshylarǵa jatatyn otbasylardan 23 jasqa deıingi kúndizgi oqý nysanyndaǵy kolledjder men JOO stýdentteri;
- tórt jáne odan da kóp birge turatyn kámeletke tolmaǵan balalary bar otbasylardan shyqqan kúndizgi oqý nysanyndaǵy kolledjder men JOO stýdentteri (18 jasqa tolǵannan keıin oqý oryndaryn bitirgenge deıin);
- 2 top múgedekteri;
- kóp balaly otbasylardan shyqqan, jeti jastan bastap mektepti aıaqtaıtyn ýaqytqa deıingi balalar.
«Búginnen bastap Krıvenko kóshesi, 25 mekenjaıy boıynsha ornalasqan «Open Pavlodar» front-keńsesiniń № 21, 22 terezelerinen tegin jol júrý bıletterin alýǵa bolady. Jumys ýaqyty 09:00-den 17:00-ge deıin, túski úzilis 13:00-den 14:30-ǵa deıin», - dep habarlady qalalyq ákimdikten.
Ekinshi toptaǵy múgedekterdiń ózimen birge jeke kýáligi, zeınetaqy kitapshasy jáne VTEK anyqtamasy, kóp balaly analarǵa, alǵashqy eki qujattan basqa – kóp balaly ana mártebesin rastaıtyn HQKO anyqtamasy, barlyq balalarǵa týý týraly kýálikterdiń kóshirmeleri jáne 3h4 eki foto bolýy qajet.
«Altyn alqa», «Kúmis alqa» alqalarymen, sondaı-aq «Batyr ana» ordenimen nagradtalǵan áıelderge balalardyń jasyna qaramastan, qoǵamdyq kólikte tegin jol júrý úshin mártebesin rastaıtyn qujattardy usyný jetkilikti. Olarǵa jol júrý aqysy berilmeıdi.
Oblys ortalyǵynyń ákimdiginde ekinshi toptaǵy múgedekterge ótken jylǵy jol júrý bıletteriniń jaramdylyq merzimi 2021 jyldyń 15 qańtaryna deıin uzartyldy.
