Pavlodarda qoǵamdyq kólikti ońtaılandyrýdyń nátıjesinde 4 mlrd teńge qarajat únemdeledi

PAVLODAR. KAZINFORM — Ońtaılandyrý aıasynda 3 baǵyttaǵy marshrýt joıyldy. Al 56 myńnan astam jolaýshy avtobýstarǵa tegin aýysyp miný qyzmetin paıdalanady. 

Pavlodar qalasy ákimdiginen habarlaǵandaı, qoǵamdyq kóliktiń marshrýttyq jelisin ońtaılandyrý boıynsha bir aıǵa sozylǵan keshendi jumys aıasynda 11 marshrýtty ońtaılandyrý jáne 2 tıimsiz baǵytty joıý josparlanǵan. Qozǵalys syzbalaryn túzetý kóliktik qoljetimdilikti, azamattardyń ótinishterin taldaý, sondaı-aq naqty jolaýshylar aǵyny men marshrýttardyń júktelý deńgeıin baǵalaý negizinde júzege asyrylǵan.

— Ońtaılandyrý qorytyndylaryn nazarǵa ala otyryp, jolaýshylar óte az júretin jáne qalalyq bıýdjetke eleýli júkteme túsirip kelgen (166 mln teńgeden astam) № 5, № 6 jáne № 17 marshrýttar joıyldy. Bul baǵyttarda qosymsha ózge avtobýstar men tramvaı marshrýttary bar, — delingen ákimdiktiń resmı aqparatynda.

Budan bylaı qala mańyndaǵy № 40, 41, 38, 66 marshrýttar temirjol vokzalyna deıin júretin boldy. Sheshim Temirjol vokzaly aýdanyndaǵy damyǵan kólik júıesin eskere otyryp qabyldandy. Aýmaqta jolaýshylar aǵyny 60 000 tranzaktsııaǵa ósken. Sondaı-aq № 66 jáne № 40 marshrýttar uzyndyǵynyń aıtarlyqtaı qysqarýyn eskere otyryp, jolaýshylar úshin bir saǵat ishinde tegin aýysyp miný engizildi. Bir aıda 56 591 adam tegin aýysyp miný qyzmetin paıdalanǵan.

Avtobýs jelilerin qaıta qaraý jáne tartylǵan avtobýstar sanyn 262-den 252-ge deıin qysqartý esebinen marshrýttarǵa qyzmet kórsetýge arnalǵan paıdalaný shyǵyndary aıtarlyqtaı tómendegen. Jolaýshylar aǵynynyń 10%-ǵa artýy tirkelgen (kúnine 169 441-den 186 814 tranzaktsııaǵa deıin).

Ákimdiktiń baspasóz qyzmeti tasymaldaýshylardy sýbsıdııalaý kólemin qysqartý esebinen bıýdjet qarajaty jyl saıyn 4 mlrd teńge únemdeletinin jetkizdi.

Buǵan deıin oblys ortalyǵyndaǵy avtobýs baǵyttary ońtaılandyryp jatqanyn, kóptegen avtobýstar jańasha baǵytta júre bastaǵanyn jazǵanbyz.