Pavlodarda jol qurylysyna erekshe asfalt paıdalanylady
PAVLODAR. KAZINFORM - Ulttyq jol aktıvteri ortalyǵynyń usynysy boıynsha bıyl merdigerler jol qurylysyna usaq tasty mastıkalyq asfaltty qoldana bastady. Bul oblystyń aýa raıy jaǵdaıyna saı keledi.
Bıyl oblys ortalyǵynda aýqymdy abattandyrý jobalary atqarylady. 15 kósheniń joly ortasha jóndelip, joldar asfalttalady, trotýarlar salynady. Lermontov kóshesindegi aýqymdy abattandyrý jobasyn aıaqtaý mindeti de tur.
- Oblys ortalyǵynda kóshe joldaryn jóndeý jumystary qazirdiń ózinde júrip jatyr. Dálirek aıtqanda, kóshe joldaryndaǵy oı-shuńqyrlar jamalýda. Al ortasha jóndeý jáne asfalttaý jumystary aldaǵy ýaqytta bastalady. Joldardan bólek, trotýarlar, áleýmettik nysandardyń aýlalary jańarady. Lermontov kóshesin abattandyrý jobasy aıasynda 38 myń sharshy metr trotýar plıtasy tóselip, asfalt jabyny tolyq aýystyrylady. Aǵash otyrǵyzylyp, balalar oıyn alańy salynady. Bir sózben aıtqanda qala turǵyndarynyń serýendeýine arnalǵan oryndardyń biri bolady degen senimdemiz,-dep habarlady qalalyq ákimdikten.
Merdigerler bıyldan jol qurylysyna usaq tasty mastıkalyq asfalt qoldanyla bastaǵan. Buǵan deıin usaq túıirshikti ystyq asfalt qoldanylyp kelipti. Usaq tasty mastıkalyq asfalt tyǵyz bolǵandyqtan, klımatqa neǵurlym beıim bolmaq. Al, jol tóseý tehnologııasy burynǵysynsha qala beredi. Mamandar jańa úlgidegi asfalt oblystyń aýa raıy jaǵdaıyna saı keletinin aıtady.
Eske sala keteıik, Pavlodarda Ýsolka eko-parkiniń qurylysy bastalady.
