Pavlodarda er adam áıeli men qyzyn uryp-soǵyp, polıtsııa qyzmetkerin jaralady

PAVLODAR. KAZINFORM - Pavlodarda mas otaǵasy qyzy men zaıybyn uryp-soqqan. Al patrýldik tártip saqshylary kelgende pyshaq ala júgirip, ınspektordy jaraqattaǵan. 

19 sáýir kúni tańǵy saǵat 06:30–da Pavlodar qalasynyń 102 qyzmetine 15 jastaǵy qyz bala habarlasyp, ákesi anasyn uryp-soǵyp jatqany týraly habarlaǵan. Qyz bala ataǵan mekenjaıǵa polıtsııa kapıtany Almaz Jaqypov pen polıtsııa leıtenanty Tólegen Isındi dereý jiberiledi.

— Qyzmetkerlerdi úıdiń kireberisinde habarlasqan qyzdyń ózi qarsy aldy. Ol ákesi ózin uryp-soqqanyn, odan soń páterde anasyn jábirlep jatqanyn jetkizgen. Polıtseıler kirgen kezde mas kúıde bolǵan 40 jastaǵy er adam qarsylyq kórsetip, polıtsııa kapıtany Almaz Jaqypovtyń sol qolynyń býynyna pyshaq salǵan. Polıtseı jaraqat alǵanyna qaramastan janjalqor otaǵasyn zalalsyzdandyryp, ustady, — dep habarlady óńirlik polıtsııa departamentiniń baspasóz qyzmetinen.

Zardap shekken polıtseıge medıtsınalyq kómek kórsetilgen. Sarapshynyń qorytyndysyna sáıkes, buzaqy er adam ortasha dárejede mas bolǵan. Polıtseılerge shabýyl jasaý deregi boıynsha Qylmystyq kodeksiniń 380-baby (Bılik ókiline qatysty zorlyq-zombylyq qoldaný) jáne 109-1-baby (Uryp-soǵý) boıynsha qylmystyq ister qozǵaldy.

Eske sala keteıik, Pavlodarda adam urlaýmen jáne bopsalaýmen aınalysqan qylmystyq top ustaldy.