Pavlodarda qyzylshamen aýyrǵandar sany kúrt ósti

PAVLODAR. KAZINFORM — Jyl basynan beri juqpaly dertti 349 adam juqtyrǵan. Onyń jartysyna jýyǵy — Pavlodar qalasynyń turǵyndary.

Óńirlik sanıtarlyq-epıdemıologııalyq baqylaý departamentinen habarlaǵandaı, qyzylshamen aýyrǵandardyń 25 paıyzy — Ekibastuzda, 20 paıyzy — Aqsýda, al 40 paıyzy — Pavlodarda tirkelgen. 

Aýyldyq jerler boıynsha Baıanaýyl aýdany kósh basynda tur.

— Qyzylsha juqtyrǵan naýqastar sanynyń kóbeıýine ata-anasynyń balalaryna vaktsına salǵyzýdan bas tartýy sebep bolyp otyr. Kóbine 14 jasqa deıingi balalar jıi aýyrady, olardyń 90 paıyzy egilmegen. Eresekter arasynda da juqpaly aýrýǵa shaldyqqandar az emes, jalpy naýqastardyń 22 paıyzyn solar qurap otyr, -dep habarlady departamentten.

Ótken jyldyń qarasha aıynan oblysta qyzylshaǵa qarsy vaktsınalaý júrip jatyr.

Jappaı ımmýndaý sheńberinde oblysta 31058 adam egildi, onyń ishinde 2388-i — 6 aılyq balalar jáne 2 jastan 4 jasqa deıingi 17066 bala bar.

Qyzylsha otıt, pnevmonııa, bronhıt, entsefalıt sııaqty asqynýlarmen qaýipti.

Aýrýdyń aýyr aǵymynda estý jáne kórý júıkesi jıi zaqymdalady, kórý qabileti nasharlaıdy. 

Aýrý baýyr men búırekke teris áser etedi, ımmýnıtetti aıtarlyqtaı buzýy múmkin.

Qyzylshaǵa qarsy ádettegi ekpe qyzylsha vırýsynyń aýyr zardaptaryn boldyrmaýǵa kómektesedi.