Pavlodarda Qyzyl kitapqa engen lashyn qutqaryldy
PAVLODAR. KAZINFORM - Jyrtqysh qus oblys ortalyǵyndaǵy kásiporyndardyń biriniń aýmaǵynan tabylǵan. Qazirgi ýaqytta ol ań-qustardy ustaıtyn panajaıǵa ornalastyryldy.
Pavlodar orman jáne janýarlar dúnıesin qorǵaý mekemesiniń basshysy Ajdar Júsipovtiń aıtýynsha, bul – bıylǵy balapan. Onyń qala ortalyǵyna qalaı kelgeni ázirshe belgisiz.
- Jas qus ekeni baıqalady. Qala ortalyǵyna qaıdan kelgenin bilmeımiz. Jergilikti kásiporyndardyń birine ushyp kelgen. Adamnan qoryqpaıdy, qolǵa qonady. Soǵan qaraǵanda, bul qusty bireýler ustap, saıatshylyqqa úıretkenge uqsaıdy, – deıdi Ajdar Júsipov.
Mamannyń aıtýynsha, lashyn arnaıy orynda shamamen bir aı ustalyp, keıin tabıǵı ortaǵa jiberiledi. Qusty Ertis ózeniniń jaıylmasyna shyǵarý josparlanyp otyr.
- Lashyn Qazaqstannyń Qyzyl kitabyna engizilgen. Óńirimizde olardyń negizgi mekeni – Baıanaýyldyń taýly aımaqtary, - dep atap ótti mekeme basshysy.
Lashyn – shúılikken oljasyn jyldam qýyp jetetin, óte shapshań ári tózimdi jyrtqysh qus. Dene bitimi ortasha, qanaty uzyn, quıryǵy qysqa keledi. Qazaqstanda sırek kezdesetin qustardyń biri.
Eske sala keteıik, Pavlodarda jyrtqysh janýardyń shabýylyna ushyraǵan jaraly aqqý qutqaryldy.
Onyń aldynda Ertis ormanynda sırek kezdesetin tarǵaq qusy kózge tústi.
