Pavlodarda Qyzyl kitapqa engen qustardy syrtqa satyp kelgender ustaldy

PAVLODAR. KAZINFORM - QR Іshki ister mınıstrligi Qyzyl kitapqa engen qustardy kontrabandalaý arnasynyń joly kesilgeni týraly habarlady.

5 aqpan kúni Pavlodar oblysynyń aýmaǵynda polıtsııa qyzmetkerleri prokýratýranyń úılestirýimen Qyzyl kitapqa engen qustardy zańsyz túrde shetelge shyǵarý boıynsha qylmystyq shemany anyqtap, jolyn kesti.

- Sırek kezdesetin qustardy aýlaý Baıanaýyl memlekettik ulttyq tabıǵı parkiniń aýmaǵynda júzege asyrylǵan. Atalǵan qylmysty jasady degen kúdikpen bir top adam, onyń ishinde Baıanaýyl ulttyq parkiniń qyzmetkerleri de ustaldy. 17 tintý sharasy júrgizilip, nátıjesinde 40-tan astam qus, 5 atys qarýy, shamamen 200 oq-dári, sýyq qarýdyń birneshe túri, qustardy ustaýǵa jáne tasymaldaýǵa arnalǵan quraldar, sondaı-aq basqa da mańyzdy aıǵaq bolar zattar tárkilendi. Memleketke keltirilgen aldyn ala shyǵyn kólemi 120 mıllıon teńgeden asady, - dep habarlady QR Іshki ister mınıstrliginen.

Qazir sotqa deıingi tergep-tekserý júrgizilip jatyr. Barlyq ustalǵan adam qamaýǵa alynǵan. Tergeý múddesine baılanysty ózge málimetter jarııa etilmeıdi.

Buǵan deıin flora men faýnamyzdy qalaı saqtap qalýǵa bolatyny týraly jazǵanbyz.