Pavlodarda Qyz uzatý dastarhanynan keıin 33 adam ýlandy

ASTANA.KAZINFORM - Toıdan keıin shara qonaqtary 24 saǵat ishinde dıareıa, qusý jáne dene qyzýynyń kóterilýine shaǵymdanyp, jedel járdem shaqyra bastady, dep habarlaıdy Kazinform tilshisi.

Toı Pavlodardaǵy Chokın kóshesindegi meıramhanada ótti. Qyz uzatýǵa 150-ge jýyq adam shaqyryldy. Qalyńdyq Ázıza Isabaıdyń aıtýynsha, kóbine salattar men tiskebasar jegender zardap shekken.

- Toıdan keıin adamdar qatty aýyrdy, olardyń dene qyzýy 40 gradýsqa jýyq kóterildi, ishteri ótip, qusty. Bul meıramhananyń taǵamyn jegennen bolǵany sózsiz. Jemis, shyryn, pırogtan emes, óıtkeni olardy balalar da jegen. Birde-bir bala zardap shekken joq. Kóbine salat taǵamdaryn jegen eresekter zardap shekti, - dedi Ázıza Isabaı.

Pavlodar oblystyq jedel járdem stantsııasynyń habarlaýynsha, bir táýlikte 33 adam kómek suraǵan. Olardyń arasynda oblystyq balalar aýrýhanasyna jetkizilgen bir bala men júkti áıel bar.

Al, densaýlyq saqtaý basqarmasy 29 adamnyń aýrýhanaǵa jetkizilgenin habarlady.

– Bakterııalyq ishek ınfektsııasynyń klınıkalyq kórinisteri bar naýqastar toıdan soń jalpy ınfektsııalyq bólimshe kómegine júgingen. Barlyǵy 29 naýqas. Onyń 15-i aýrýhanaǵa jatqyzyldy, 14-i ambýlatorlyq emdeýge jiberildi. Búgingi kúni aýrýhanaǵa jatqyzylǵandardyń jaǵdaıy ıntoksıkatsııa, ish ótý, gıpertermııalyq sındromǵa baılanysty ortasha aýyrlyqta dep baǵalandy. Olar tolyq em qabyldap jatyr, - dep habarlady Pavlodar oblystyq densaýlyq saqtaý basqarmasynan.

Aıta keteıik, 2024 jyldyń sáýir aıynda Ekibastuzda toıǵa jınalǵan qonaqtar tamaqtan jappaı ýlanyp qalǵan edi.

Al qarasha aıynda tamaqtan ýlanyp qalǵan 16 adam Ekibastuzdaǵy «Grand Hall» meıramhanasynyń ıesinen jalpy somasy 6 mln teńge talap etip, sotqa ujymdyq talap aryz túsirdi.

Keıin sot sheshiminen tamaqtan ýlanǵandarǵa meıramhana ıesi 5 mln teńgeden astam ótemaqy tóleıtin boldy.