Pavlodarda kitap festıvali ótti
PAVLODAR. QazAqparat - Pavlodarda «Kitap Time-2022» festıvali ótti. Ol elimiz boıynsha tuńǵysh ret uıymdastyrylyp otyrǵan shara, dep habarlaıdy Pavlodarnews.kz.
S.Toraıǵyrov atyndaǵy oblystyq kitaphanada atalǵan festıvaldiń ashylý saltanaty ótti. Budan soń kitapsúıer qaýym túrli formatta uıymdastyrylǵan ádebı-mádenı sharalarǵa qatysty. Atap aıtsaq, «Oblystyq kitaphana – birinshi kýrs stýdentterine» atty kitap kórmesi ashyldy. Kórmeni tamashalaǵan alǵashqy kýrstyń stýdentteri kitaphananyń tynys-tirshiligimen tanysty.
«Bul festıval bıyl alǵash ret uıymdastyrylyp otyr. Maqsat – kitaphanalarǵa oqyrman tartý. Jalyndy jastardyń kitapqa degen qyzyǵýshylyǵyn arttyrý. Kópshilik nazaryn el boıynsha bir sátke kitapqa aýdarý. Qazirgi qoǵam úshin bul óte mańyzdy. Atalǵan festıvaldi keler jyly budan da keń kólemde uıymdastyramyz dep oılaımyn»,-deıdi S.Toraıǵyrov atyndaǵy kitaphana basshysy Sholpan Shahmetova.
Sondaı-aq festıval aıasynda belgili jyrshy, Abaıtanýshy Danııal Ásenov jastarmen kezdesip, Abaıdyń qara sózderimen qatar Maǵjannyń marjan jyrlaryn, Batyr Baıan men Qoblandy batyr jyrlarynan úzindilerdi jatqa oqyp kópshilikti tań-tamasha etti.
Al áleýmettik jelilerde óz belsendiligin arttyrǵysy kelgen jastar bloger Irına Kovalevanyń «Business community» jobasy aıasynda dáris tyńdady.
Budan bólek, «Jyrlasa jastar jyrlasyn» taqyrybynda ótken poetıkalyq keshke qatysqan jas qalamgerler ádebı álemde ózderin tolǵandyryp júrgen saýaldaryn ortaǵa salyp, pikir almassa, «100 jańa oqýlyq» kitap kórmesi Pavlodar pedagogıkalyq ýnıversıtetiniń atsalysýymen ótti. Bul kórme aldaǵy bir apta boıy oqyrman nazaryna usynylatyn bolady.
Sonymen qatar bul kúni oqyrmandardy kitap oqýǵa úgitteıtin erekshe formattaǵy qyzyqty shara uıymdastyryldy. Bul sharaǵa úlkender de jastar da qatysty.
