Pavlodarda qystaı jaýǵan qardyń jamylǵysy 2 metrge deıin jetken

PAVLODAR. KAZINFORM - Óńirdegi ylǵal qory normadan 40 paıyzǵa joǵary. Al topyraqtyń tońdanýy 157 santımetrge jetken. Bul kóktemde keıbir eldi mekenderdi sý astynda qaldyrýy múmkin.

Aqtoǵaı men Sharbaqty aýdandarynda qystaı jaýǵan qardyń qalyńdyǵy 2 metrge jýyqtap qalǵan. Bul aýdandarda jazǵyturym qar jyldam erise, jaǵdaı kúrdelenýi múmkin. Aqtoǵaıdaǵy Shilikti aýylynyń mańaıynda qar sýy kóp jınalsa, oıpańda ornalasqan eldi mekendi basyp qalýy yqtımal.

Bul týraly Pavlodar oblysy ákiminiń baspasóz qyzmetinen habarlady.

«Qazirgi kúni Pavlodar, Jelezın, Maı, Ýspen, Ertis, Aqqýly aýdandarynda qar shyǵarý jumystary óte sylbyr júrip jatyr. Ásirese Baıanaýyl men Aqtoǵaı aýdandarynda sý tasqyny qaýpi zor. Shalǵaı eldi mekenderde qardy syrtqa tasý óte baıaý júrýde. Jergilikti ákimderge qar shyǵarý jumystaryn bir apta ishinde aıaqtaý tapsyryldy. Sondaı-aq respýblıkalyq jáne óńirlik mańyzǵa ıe avtojoldardaǵy sý ótkizetin qubyrlardy 1 naýryzǵa deıin arshý týraly jaýapty mekemelerge júkteldi», - dep málimdedi baspasóz qyzmetinen.

Qazir oblysta kóktemgi sý tasqynyna qarsy daıyndyq sharalary pysyqtalý ústinde. Yqtımal jaǵdaılarǵa 616 tehnıka, 42 júzý quraly, 198 motopompa ázir tur. Ertis ózeniniń Maı aýdanynyń Qaraterek aýyly tusyndaǵy jaǵalaýy nyǵaıtylyp, Aqtoǵaıdaǵy Sileti ózeniniń arna boıynda topyraq úıindileri bıiktetildi.