Pavlodarda qyrkúıektiń ortasynda aýa temperatýrasy 25 gradýsqa deıin kóteriledi
PAVLODAR. KAZINFORM - Ertis-Baıan óńirinde qyrkúıektiń alǵashqy kúnderi aýa temperatýrasy kúrt tómendep, jazǵy ystyqty kúzdiń salqyn aýa raıy almastyrdy. Túngi aýa temperatýrasy +3…+5 gradýsty kórsetip tur.
«Qazgıdromet» RMK oblystyq fılıalynyń málimetinshe, qyrkúıektiń alǵashqy onkúndiginde kúndiz aýa temperatýrasy +12…+17 gradýs aralyǵynda bolady. Túnde temperatýra +6 gradýsqa deıin tómendep, topyraq betinde +2 gradýsqa deıin úsik júrýi yqtımal.
Mamandardyń boljamynsha, aıdyń ekinshi onkúndigi qyrkúıektegi eń jyly kezeń bolady. Bul ýaqytta túngi aýa temperatýrasy +10…+15, kúndiz +20…+25 gradýsqa deıin kóteriledi.
- Aıdyń sońǵy onkúndiginde temperatýra qaıtadan tómendeı bastaıdy. Túnde negizgi temperatýra 0…+5 gradýs shamasynda bolyp, oblystyń keı jerlerinde úsik júrýi múmkin. Kúndiz aýa temperatýrasy +10…+15 gradýs aralyǵynda bolady, – dep habarlady «Qazgıdromet» mamandary.
Osylaısha, Pavlodar oblysynda halyq arasynda «mızam shýaq» atalatyn jyly ári jaımashýaq kúzgi kezeń qyrkúıektiń ortasynda ótýi yqtımal.
«Qazgıdromet» málimetinshe, qyrkúıek aıyndaǵy aýanyń ortasha temperatýrasy klımattyq normaǵa saı, +11…+13 gradýs shamasynda bolady. Degenmen jaýyn-shashyn mólsheri ádettegiden kóp bolýy múmkin. Mamandar aı boıy jańbyrdyń jıi jaýatynyn, jeldiń ekpini kúsheıip, naızaǵaı oınaýy yqtımal ekenin eskertedi.
Eske sala keteıik, dúnıejúzilik muhıt temperatýrasy baqylaý tarıhyndaǵy rekordty jańartty.
