Pavlodarda kıberpolıtseıler zeınetkerdiń 5 mln teńgesin alaıaqtardan saqtap qaldy
ASTANA. KAZINFORM – Pavlodar qalasynda zeınetkerge telefon arqyly jasalǵan alaıaqtyq áreketiniń joly kesildi.
Polisia.kz-tiń málimetishe, belgisiz tulǵalar áıelge domofon qyzmetiniń qyzmetkerleri retinde qońyraý shalyp, qurylǵyny aýystyrý qajettigin aıtyp, tirkeý úshin SMS-kodty berýin suraǵan. Áıel alynǵan kodty habarlaǵannan keıin oǵan qaıta habarlasyp, ruqsatsyz kirý bolǵanyn jetkizgen. Keıin alaıaqtar ózderin quqyq qorǵaý organdary men Qarjylyq monıtorıng agenttiginiń qyzmetkerleri retinde tanystyryp, shottaǵy aqshany shuǵyl sheship alý jáne ári qaraıǵy nusqaýlardy kútý qajettigin túsindirdi.
– Alaıaqtardyń nusqaýyn oryndaǵan áıel qaladaǵy eki ekinshi deńgeıli bank bólimshesine baryp, qarajat sheshý jáne nesıe rásimdeý áreketin jasaǵan. Ekinshi bank qyzmetkerleri alaıaqtyq belgilerin baıqap, polıtsııaǵa habarlaǵan. Osylaısha quqyq qorǵaý organdary men bank qyzmetkerleriniń qyraǵylyǵynyń arqasynda zeınetker 5 mıllıon teńgeden aıyrylmady, - dep habarlady Pavlodar oblysy polıtsııa departamentiniń kıberqylmysqa qarsy is-qımyl basqarmasynyń bastyǵy Ashat Ábetjanov.
Zeınetker polıtsııaǵa alǵysyn bildirip, qarajatyn saqtap qalýǵa kómektesken qyzmetkerlerdiń is-áreketin baǵalady.
Polıtsııa azamattardy saq bolýǵa shaqyryp, memlekettik organdar men bankter eshqashan SMS-kodtardy suramaıtynyn, shottaǵy qarajatty sheshýdi nemese aýdarýdy talap etpeıtinin eskertedi. Osyndaı qońyraýlar túsken jaǵdaıda áńgimeni toqtatyp, dereý polıtsııaǵa habarlasý qajet.
Budan buryn 20 jastaǵy jigit Free Fire oıyny arqyly jasóspirimderdi aldap, alaıaqtyq jasaǵanyn jazǵanbyz.
