Pavlodarda kıberalaıaqtyqqa arnalǵan qurylǵylar tárkilendi

PAVLODAR. KAZINFORM — Pavlodarda ınternet-alaıaqtyqqa paıdalanylǵan sim-box qurylǵylary áshkerelendi. Bul týraly Polisia.kz jazdy. 

27 naýryz kúni kıberpolıtsııa qyzmetkerleri Pavlodar oblysynda ınternet-alaıaqtyq jasaý úshin qoldanylǵan eki sim-box qurylǵysyn anyqtap, tárkiledi. 

— Atalǵan jabdyqty zańsyz saqtap, paıdalanǵan degen kúdikpen 23 jastaǵy azamat ustaldy. Ol ýaqytsha ustaý ızolıatoryna qamaldy. Páterdi tekserý barysynda 128 jáne 32 slotqa arnalǵan 2 sim-box qurylǵysy, 115 SIM-karta, Wi-Fi roýterler jáne 32 uıaly telefon tárkilendi, — delingen habarlamada.

Anyqtalǵandaı, kúdikti zańsyz áreketi úshin Kaspi-degi jeke shotyna 100 myń teńge kóleminde syıaqy alǵan. Qazirgi ýaqytta uqsas faktilerdi anyqtaý jáne ustalǵan azamattyń ınternet-alaıaqtyqtyń ózge de epızodtaryna qatystylyǵyn tekserý maqsatynda jedel-izdestirý is-sharalary júrgizilip jatyr.

Іshki ister mınıstrliginiń kıberqylmysqa qarsy is-qımyl departamenti alaıaqtyq maqsatta paıdalanylatyn jabdyqtardy anyqtaý jáne tárkileý boıynsha júıeli jumystardy jalǵastyra beredi.

Buǵan deıin polıtsııa kıberqylmystyń jańa túri týraly eskertken bolatyn.