Pavlodarda Keńes odaǵy batyrynyń zeńbiregi saqtaýly tur
PAVLODAR. KAZINFORM — Pavlodar qalasyndaǵy Áskerı Dańq mýzeıinde Keńes odaǵynyń batyry Mahmet Qaıyrbaevtyń soǵysta serigi bolǵan zeńbirek saqtalyp tur. Ol 1992 jyly Lıtvanyń Vılnıýs qalasynan elimizge jetkizilgen.
7385 nómirli zeńbirek 1944 jyly aqpan aıynda jasalǵan. Sol jyldyń tamyz aıynda aǵa leıtenant Mahmet Qaıyrbaev basqarǵan 5-shi batareıaǵa jetkiziledi. Qaıyrbaev bastaǵan zeńbirekshiler qolyna starshına Gorshkovtyń esebinen tapsyrylǵan.
Soǵys quraly Ekinshi dúnıejúzilik soǵysta 2200 shaqyrymnan astam jer júrip, jaý snarıadtarynyń áserinen 10 ret isten shyqqan. Biraq jóndelgen soń qaıtadan qatarǵa qosylyp otyrǵan.
Joıqyn qarýdan jaýǵa qarsy 1193 snarıad atylyp, 10-nan asa tank, 14 pýlemet, 2 avtokólik, 8 vzvod jáne 3 baqylaý pýnkti qıratylǵan.
— Ákem 1991 jyly «Kazahstanskaıa pravda» gazetinen Keńes odaǵynyń batyry Chernıkovskııdiń eskertkishi syndyrylǵany týraly maqala oqypty. Sodan Lıtva jerindegi zeńbirektiń jaıyna alańdaı bastady. Іshki oıyn áriptesterine jetkizip, ózimen úzeńgiles el aǵasy Qabıden Jumabekovke de aıtqan bolýy kerek. Qabıden aǵamyz óziniń uly, kásipker Keńeske bizdiń ákemizdiń zeńbiregin týǵan jerine aldyrýdy oılastyrýdy suraıdy. Sóıtip oblystyq ardagerler keńesimen aqyldasyp, uıym atynan Lıtvaǵa hat jazylady. Alǵash barǵanda zeńbirek jekeniń qolyna ótip ketkeni málim boldy. Qaltaly azamattyń biri ony teńiz jaǵalaýyna qoımaqshy bolǵan kórinedi. Keńes álginiń kóńilin taýyp, zeńbirekti qaıtaryp aldy. Aýyr qarý bólshektelip, júk kóligimen Qazaqstanǵa jetkizildi, — dep eske alady batyrdyń uly Murat Qaıyrbaev.
Otty jyldar belgisindeı bolǵan batyrdyń zeńbiregi búginde mýzeı aýlasynan oryn tapqan.
Eske sala keteıik, buǵan deıin Pavlodardaǵy mýzeıde Mánshúk Mámetovanyń samaýyry saqtaýly turǵanyn habarlaǵan edik.