Pavlodarda «Qazposhta» balalar úılerine tegin gazet-jýrnaldar jazdyryp berdi
ASTANA. QazAqparat - «Qazposhta» AQ Pavlodar oblystyq fılıaly oblys ortalyǵyndaǵy eki balalar úıine ózderi qalaǵan gazet-jýrnaldarǵa jazylyp, túbirtekterin syıǵa tartty, dep habarlaıdy pavlodarnews.kz.
«Qazposhta» bólimshesiniń marketology Aınýr Gabdarhymovanyń aıtýynsha, oblystyq mamandandyrylǵan balalar úıiniń tárbıelenýshileri «Kalııakı-malııakı», «Logoped» jýrnaldaryn jáne «Masha ı medved» gazetin oqyǵysy keletinderin aıtqan. Sonymen qatar, Pavlodar qalasyndaǵy Osıpenko kóshesi, 13 meken-jaıyndaǵy otbasy úlgisindegi balalar aýylynyń búldirshinderi «Bala bı», «Ertegiler elinde», «Jyl 12 aı» jýrnaldaryna jáne «Bal jumbaq», «Drýjnye rebıata» gazetterine tapsyrys bergen. Qam kóńil jandardyń osy tilekterin oryndaý maqsatynda poshta qyzmetkerleri el Táýelsizdiginiń 25 jyldyǵy mereıtoıy qurmetine joǵaryda atalǵan gazet-jýrnaldardyń barlyǵyn aldaǵy bir jylǵa jazyp, mekeme ujymyna túbirtekteri men sertıfıkatyn syıǵa tartty. Endi olar 2017 jyldyń qańtar aıynan bastap ózderi qalaǵan gazet-jýrnaldaryn tegin alyp oqıtyn bolady.
" Bizdiń mekemede 60 bala tárbıelenedi. Olardyń 40-tan astamy orta mektepte jáne 10-nan astamy kolledjderde bilim alady. Bizde tárbıelenýshilerdiń kóbi qazaq balalary bolǵandyqtan, ana tilindegi gazet-jýrnaldardy oqıdy. Elimizdiń eń úlken merekesi Táýelsizdik kúni qarsańynda osyndaı qamqorlyq jasap, balalar basylymdaryna bir jylǵa tegin jazdyryp bergen «Qazposhta» qyzmetkerlerine alǵysym sheksiz", - deıdi otbasy úlgisindegi balalar aýylynyń dırektory Gúlbaǵda Kárimova.
