Pavlodarda «Qazqonaq» tabıǵı eskertkishin saqtap qalý maqsatynda Jol kartasy ázirlenedi
PAVLODAR. KAZINFORM — Ertis ózeniniń jaǵalaýynda «Qazqonaq» dep atalatyn biregeı tabıǵı eskertkish ornalasqan. Ejelgi janýarlardyń qańqasyna toly paleontologııalyq jaǵalaý jyl saıyn mújilip, quryp barady.
Baıanaýyl ulttyq tabıǵı parki memlekettik organdardyń, ǵylymı jáne qoǵamdyq uıymdardyń ókilderiniń qatysýymen keńeıtilgen vedomstvoaralyq jumys keńesi ótkenin habarlady.
— «Qazqonaq» — ǵylymı jáne tarıhı mańyzy bar tabıǵı mura. 2018 jyldan beri ol «Baıanaýyl» memlekettik ulttyq tabıǵı parkiniń qaraýynda. Kezdesý barysynda eskertkishtiń qazirgi jaǵdaıy, ony qorǵaý, ǵylymı zertteý jumystaryn damytý jáne týrıstik áleýetin arttyrý máseleleri qaraldy, — dep málimdedi ulttyq parkten.
Kóterilgen mańyzdy máseleniń biri — tabıǵı eskertkishti saqtaý jáne damytý jónindegi jol kartasyn ázirleý. Sebebi jaǵalaý Ertis ózeniniń sýymen shaıylyp jatyr. Qatysýshylar naqty is-sharalardy, jaýapty taraptardy jáne iske asyrý merzimderin aıqyndaýǵa qatysty usynystardy talqylaǵan.
Paleontolog ǵalym, Á.Marǵulan atyndaǵy Pavlodar pedagogıkalyq ýnıversıtetiniń professory Valentına Alııasovanyń aıtýynsha, «Qazqonaq» neogen kezeńine tıesili.
Neogen — kaınozoı erasynyń uzaqtyǵy 24,6 mln jylmen ólshenetin ekinshi (ortańǵy) geologııalyq kezeń. Budan 23–1,6 mln jyl burynǵy ýaqyt aralyǵyn qamtyǵan. Osy kezeńde qalyptasqan aýmaq ýaqyt óte ejelgi janýarlardyń qorymyna aınala bastaıdy. Ótken ǵasyrdyń ortasynda atalǵan aýmaqtan arheologtar ejelgi janýarlardyń 600-den astam túrin anyqtaǵan. Mundaı asa baı tabıǵı kollektsııa jer betinde Ertis-Baıan óńirinde ǵana bar.
Eske salaıyq, buǵan deıin «Qazqonaq» eskertkishine ulttyq ıgilik mártebesi berilýi múmkin ekenin jazǵanbyz.
