Pavlodarda «QazAvtoJol» fılıalynyń dırektory sottaldy

PAVLODAR. KAZINFORM - Pavlodarda merdigerden 4 mln teńge para alǵan «QazAvtoJol» fılıalynyń dırektory sottaldy. Uıym bólimshesiniń bas mamany onyń sybaılasy bolǵany anyqtaldy. Ekeýi avtojolǵa qyzmet kórsetýshi fırma basshylyǵyn qorqytyp, iri kólemde aqsha talap etip kelgen.

Pavlodar qalasynyń №2 soty «QazAvtoJol» ulttyq kompanııasy» AQ Pavlodar oblystyq fılıalynyń dırektory A.M.-ǵa jáne bas maman Ó.Z.-ǵa qatysty qorqytý jolymen iri mólsherde para alý faktisi boıynsha qylmystyq isti qarady.

Belgili bolǵandaı, ótken jyldyń maýsym aıynda laýazymdy tulǵalar oryndalǵan jumystardyń aktisine qol qoımaımyz jáne Pavlodar-Astana avtojolyn kútip ustaý boıynsha memlekettik satyp alý týraly shartty buzamyz dep qorqytyp, merdigerden jalpy somasy 4 000 000 teńge para retinde aqsha alǵan.

Buǵan qosa fılıal basshysyna laýazymdyq ókilettikterin asyra paıdalandy degen aıyp ta taǵyldy.

«Sottalýshylar ózderine taǵylǵan kináni tolyqtaı moıyndaǵan joq jáne aqtaýdy surady. Olardyń otbasynda jas balalardyń bar bolýyn eskere otyryp, sot fılıal basshysyn – 8, bas mamandy 7 jylǵa bas bostandyǵynan aıyrý jazasyn kesti», - dep habarlady Pavlodar qalalyq №2 sotynyń baspasóz qyzmeti.

Úkim zańdy kúshine engen joq.