Pavlodarda qazandyqtar men jelilerdegi jóndeý jumystaryn 10 qyrkúıekke deıin aıaqtaý kózdelip otyr

PAVLODAR. KAZINFORM — Bıyl oblystyń jylýmen jabdyqtaý salasyna 35,7 mlrd teńge ınvestıtsııa salynǵan. Óńirdegi 2499 kópqabatty turǵyn úıdiń 2477-si (99,1%) jylý maýsymyna daıyn tur.

Júrgizilgen jóndeý jumystarynyń arqasynda 46 jabdyq jańaryp, 31,1 km jylý jelilerin qaıta jańartýǵa múmkindik týǵan.

— Jylýmen jabdyqtaý salasyna 35,7 mlrd teńge ınvestıtsııa salyndy. ERG quryltaıshylary negizgi jylý kózderin jóndeýge qosymsha qarajat bóldi. Pavlodar qalasyndaǵy № 1 JEO-ǵa 5,3 mlrd teńge baǵyttaldy. Bul negizgi jáne qosalqy jabdyqtardaǵy jóndeý jumystarynyń kólemin ulǵaıtýǵa múmkindik berdi. Aqsýdaǵy ROK-2-de barlyq qazandyqtardy jóndeýden basqa, kómekshi júıelerdi jańartýǵa 1,5 mlrd teńge bólindi. Tozyǵy jetken elektr jelileriniń máselesin sheshý úshin «PREK» AQ 14,7 mlrd teńgege ınvestıtsııalyq baǵdarlama ázirledi. Ony iske asyrý 2026 jyly bastalady, — dep habarlady oblys ákiminiń baspasóz qyzmetinen.

Qazirgi ýaqytta óńirdegi 2499 kópqabatty turǵyn úıdiń 2477-si (99,1%) jylý maýsymyna daıyn. Atap aıtqanda, Pavlodar qalasy boıynsha 1268 kópqabatty turǵyn úıdiń, Ekibastuz qalasy boıynsha 635 kópqabatty turǵyn úıdiń, Aqsý qalasynda 265 úıdiń ázirlikteri 100%-dy kórsetip otyr. Al áleýmettik sala nysandary boıynsha daıyndyq kórsetkishteri kelesideı: bilim berý — 566 mekemeniń 563-i (99%), densaýlyq saqtaý — 305 mekemeniń 286-sy (94%), avtonomdy qazandyqtar — 394 mekemeniń 389-y (99%) daıyn.

Oblysta gıdravlıkalyq synaqtardyń nátıjeleri boıynsha 295 aqaý anyqtalyp, búginde 269-y joıylǵan. Qalǵan 26 aqaýdy jóndeý jumystaryn 2 qyrkúıekke deıin aıaqtaý josparlanyp otyr.

— Qalalar men aýdandardyń ákimderine 10 qyrkúıekke deıin qazandyqtar men ınjenerlik jelilerdi kúrdeli jóndeý jumystaryn aıaqtaý, sondaı-aq kómir jetkizýdi qamtamasyz etý mindeti qoıyldy, — dep málimdedi ákimdikten.

Eske sala keteıik Premer-mınıstr jylý berý maýsymyna daıyndyǵy tómen óńirler qatarynda Ekibastuz qalasyn da ataǵan edi.