Pavlodarda qazan aıynan bastap elektr energııasy men aýyzsýdyń tarıfteri ózgeredi
PAVLODAR. KAZINFORM - Pavlodarda qazan aıynan elektr energııasynyń tarıfi birshama ósip, al aýyzsýmen jabdyqtaý qyzmeti kerisinshe arzandaıdy.
Tabıǵı monopolııalardy retteý komıtetiniń Pavlodar oblystyq departamentiniń basshysy Nurlan Nurmuratovtyń aıtýynsha, jeke turǵyndar úshin elektr energııasynyń tarıfi qosylǵan qun salyǵyn eseptemegende 1 kVt/saǵ úshin 1 teńgege nemese 5 paıyzǵa ósedi. Bul ózgeris «Pavlodarenergo» aktsıonerlik qoǵamy úshin elektr energııasyn satyp alý qunynyń qymbattaýyna baılanysty engiziledi.
- Eger aldaǵy ýaqytta elektr energııasyn satýshy nemese tasymaldaýshy kompanııalar baǵany kótermese, bul tarıf 2027 jylǵy qyrkúıekke deıin qoldanylady, – dep túsindirdi departament basshysy.
Sonymen qatar, Pavlodarda aýyz sýdyń tarıfi tómendeıdi. 1 qazannan bastap jeke turǵyndar úshin bir tekshe metr sýdyń quny 97 teńgeden 92 teńgege deıin (QQS-syz) kemıdi.
Departamenttiń málimetinshe, «Pavlodar-Vodokanal» JShS ınvestıtsııalyq baǵdarlama aıasynda alǵan mindettemelerin tolyq oryndamaǵan. Osyǵan baılanysty kásiporynǵa ótemdik tarıf engizilgen.
- Bul tarıf kelesi jyldyń qyrkúıegine deıin qoldanylady. Sebebi ýaqytsha ótemdik tarıf 12 aı merzimge engiziledi. Budan bólek, halyq úshin sý burý tarıfi 1 teńgege tómendeıdi, - dep qosty departament basshysy.
Al jylý tarıfi 2026 jyldyń sońyna deıin ózgermeıdi. Onyń quny 1 Gkal úshin 4078 teńge (QQS-syz) deńgeıinde saqtalady.
Buǵan deıin Atyraýda elektr energııasy men jylý tarıfi ózgerýi múmkin ekenin jazǵanbyz.
