Pavlodarda qazaq kúresinen QR chempıonaty ótip jatyr
PAVLODAR. QazAqparat - Pavlodar qalasynda qazaq kúresinen 2003-2004 jyly týylǵan jasóspirimder arasyndaǵy QR chempıonaty ótip jatyr. «Avtomobılıst» sport kesheninde ótken saltanatty ashylý rásiminde shahar basshysy Nurjan Áshimbetov jas palýandarǵa sáttilik tiledi, dep habarlaıdy pavlodarnews.kz.
«Barlyqtaryńyzǵa Ertis óńirine qosh keldińizder degim keledi», - dedi Nurjan Áshimbetov. - Qalamyzda aýqymdy , respýblıkalyq, halyqaralyq dárejedegi jarystar ótip turady. Sizder de Naýryz merekesiniń qarsańynda óńirimizge taban tirep tursyzdar. Barshańyzdy kele jatqan Ulystyń uly kúnimen quttyqtaımyn! Naýryz tek qana jaqsylyqtar alyp kelsin! Bolashaqtaryńyz jarqyn bolsyn! Osy dodada tóreshilerge ádildik, palýandarǵa sáttilik tileımin!».
Pavlodar oblystyq qazaq kúresi federatsııasynyń atqarýshy dırektory Darhan Jolamanov óńirde ótip jatqan básekege 400-ge jýyq sportshy qatysyp jatqanyn atap ótti. - Bul chempıonatqa elimizdiń barlyq oblystarynan jáne Astana, Almaty qalalarynyń úmitkerleri qatysýda, - dedi Darhan Jolamanov. - Palýandar segiz salmaq dárejesi boıynsha baq synaıdy. Bizde ótip jatqan jarystyń ereksheligi - ózge chempıonattarda ár óńirden bir salmaqtan bir-eki sportshy qatyssa, bul synda komandalar ár salmaqqa úsh úmitkerden qosyp otyr. Sondaı-aq, júldeli birinshi jáne ekinshi oryn alǵandar «Qazaq kúresinen QR sport sheberine úmitker» atanady.
Aıta ketelik, 384 jas palýandar kúsh synasyp jatqan chempıonat úsh kúnge jalǵasady.
