Pavlodarda qaıtys bolǵandarǵa 58 mln teńge tólemaqy tólenip kete jazdaǵan
PAVLODAR. QazAqparat - 2018 jyly Pavlodar oblysynda qaıtys bolǵan 1 212 adamǵa jalpy 58,3 mln teńge mólsherinde áleýmettik tólemaqynyń tólenýine jol berilmedi, dep habarlaıdy QazAqparat tilshisi.
«Sońǵy eki jylda áleýmettik tólemaqynyń jalpy somasy 185 mıllıon teńgeden asatyn artyq tóleminiń aldyn aldyq», - deıdi Memlekettik qyzmet isteri jáne sybaılas jemqorlyqqa qarsy is-qımyl agenttiginiń Pavlodar oblystyq departamentiniń ókilderi.
2018 jyly osy mekeme QR Bas prokýratýrasynyń Quqyqtyq statıstıka jáne arnaıy esepke alý komıtetiniń basqarmasy, kóshi-qon polıtsııasy, densaýlyq saqtaý basqarmasy jáne «Azamattarǵa arnalǵan úkimet» memlekettik korporatsııasynyń «Áleýmettik tólemaqylardyń vedomstvoaralyq esepke alý ortalyǵy» departamenti arasynda úshjaqty memorandým jasasýǵa muryndyq bolǵan edi. Bul zeınetaqy jáne áleýmettik tólemderdiń basqa da túrleriniń artyǵymen tóleýdiń aldyn alýǵa, memleketten járdemaqy alýshylardyń ólimi jaıyndaǵy málimetterdi almasýǵa septigin tıgizip jatyr.
«2018 jyldyń 19 jeltoqsanynan beri Pavlodar oblysynyń quqyqtyq statıstıka jáne arnaıy esepke alý basqarmasy «Azamattarǵa arnalǵan úkimet» MK fılıalyna qaıtys bolǵandar týraly málimetterdi jiberip keledi. Qazirge deıin qaıtys bolǵan 1 212 adamǵa jalpy 58,3 mıllıon teńge mólsherinde artyq áleýmettik tólemaqy tóleýdiń aldy alyndy», - deıdi Memlekettik qyzmet isteri jáne sybaılas jemqorlyqqa qarsy is-qımyl agenttiginiń Pavlodar oblystyq departamentiniń ókilderi.
Aıta keteıik, oblysta 2017-2018 jyldary artyq tólengen soma 186 mıllıon teńgeden asqan.
