Pavlodarda qaıtys bolǵannan keıingi donor eki adamnyń ómirin saqtap qaldy
ASTANA. KAZINFORM — Pavlodar qalasyndaǵy №1 qalalyq aýrýhanada 44 jastaǵy turǵynnyń qaıtys bolǵannan keıingi donor bolýyna baılanysty kóp aǵzalyq transplantatsııa otasy sátti júrgizildi, dep habarlaıdy DSM baspasóz qyzmeti.
Bul operatsııa respýblıkalyq deńgeıde úılestirilip, arnaıy mamandardyń qatysýymen ótti. Donordyń júregi men búırekteri eki túrli patsıentke aýystyrylyp, olar ómirlik mańyzdy medıtsınalyq kómekti der kezinde aldy.
Aǵzalardy alý men jetkizý protsesine Ulttyq ǵylymı onkologııa ortalyǵy men «UMC» korporatıvtik qorynyń transplantolog-dárigerleri qatysty. Naýqastar – aǵzany kútý paraǵynda turǵan azamattar – birden respýblıkalyq tirkelim arqyly anyqtalyp, operatsııa shuǵyl jasaldy.
Bul jaǵdaı Qazaqstanda qaıtys bolǵannan keıingi donorlyq pen transplantologııa salasynyń mańyzdylyǵyn taǵy bir márte kórsetti. Donor bolǵan azamattyń týystary kelisim berip, eki adamnyń ómirin saqtap qalýǵa sebepker boldy.
2025 jylǵy 10 tamyzdaǵy málimet boıynsha, elimizde transplantatsııany kútip jatqan adamdar sany 4 384-ke jetti. Olardyń arasynda:
-
3 890 eresek pen 90 balaǵa búırek,
-
201 eresek pen 21 balaǵa baýyr,
-
25 eresek pen 2 balaǵa ókpe,
-
143 eresek pen 6 balaǵa júrek,
-
4 eresek pen 2 balaǵa júrek-ókpe kesheni qajet.
Bul derekter Qazaqstanda aǵza donorlyǵyna degen qajettilik joǵary ekenin jáne bul baǵyttaǵy mádenıetti damytý mańyzdy ekenin kórsetedi.
Budan buryn Qyzylordada máıittik donor máselesi kenje qalyp turǵanyn jazǵan edik.