Pavlodarda qaýipsizdik beldigin taqpaı, dórekilik tanytqan azamat 20 táýlikke qamaldy
PAVLODAR. KAZINFORM - Ol buǵan deıin áleýmettik jelidegi tikeleı efırler barysynda qaýipsizdik beldigin taqpaı, kólik júrgizetinin kórsetip maqtanǵan. Jergilikti belsendilerdiń shaǵymynan keıin polıtsııa beınejazbazbalardy tekserip, azamattyń jeke basyn anyqtady.
Bul týraly óńirlik polıtsııa departamentinen habarlady.
- Jelidegi tikeleı efır kezinde er adam avtokólikti basqaryp kele jatyp, kópshilik aldynda bylapyt sózder aıtyp, aınalasyndaǵylarǵa qurmetsizdik tanytqan. Sonymen qatar, júrgizýshi qaýipsizdik beldigin taqpaı kólik basqarǵan. Polıtsııa qyzmetkerleri onyń jeke basyn jedel anyqtady. Quqyq buzýshy Pavlodar qalasynyń 26 jastaǵy turǵyny Aslan Amantaev bolyp shyqty, - dep málimdedi oblystyq polıtsııa departamentinen.
Kináli jigit ákimshilik jaýapkershilikke tartylyp, 20 táýlikke ákimshilik qamaýǵa alyndy.
Polıtsııa áleýmettik jelilerde, onyń ishinde tikeleı efırler kezinde jarııalanǵan quqyqqa qaıshy kontent quqyqtyq baǵalaýsyz qalmaıtynyn eskertedi.
Eske sala keteıik, Abaı oblysynda TikTok efırinde balaǵat sóz aıtqan boıjetken qamaýǵa alyndy.
