Pavlodarda qatty jel saldarynan aýyl mektebi túgi qalmaı janyp ketti
PAVLODAR. KAZINFORM — Ertis aýdanynyń Bulanbaı aýylyndaǵy negizgi mektep órtenip ketti. Oqys oqıǵadan pedagogtar men oqýshylar zardap shekpegen.
Búgin tańerteń tótenshe jaǵdaı qyzmetiniń pýltine Ertis aýdany Bulanbaı aýylynda ornalasqan negizgi mektep ǵımaratynda órt shyqqany týraly habarlama kelip túsken. Tilsiz jaý bilim uıasyna beıimdelgen bólek turǵan bir qabatty ǵımaratta tutanǵan. Bul nysan 2010 jyly salynǵan. Aldyn ala boljam boıynsha órtke elektr symdaryndaǵy qysqa tuıyqtalý sebep bolǵan.
— Qatty jelden ǵımarat janynda turǵan elektr baǵanasynda qysqa tuıyqtalý bolǵan. Órt sodan paıda bolýy múmkin. Órt shalǵan aýmaq 153 sharshy metrdi quraıdy. Janyp ketken mektepti qarap shyqtyq, ǵımaratty qaıta qalpyna keltirý múmkin emes. Qurban bolǵandar men zardap shekkender joq, — dep habarlady Pavlodar oblysy bilim berý basqarmasynan.
Atalǵan mektepte 20 oqýshy oqyp kelgen. Oqıǵa ornynda Ertis aýdanynyń ákimi men óńirlik bilim berý basqarmasynyń basshysy bolyp, Bulanbaı aýyly turǵyndarymen jıyn ótkizgen. Onda oqý úderisin ári qaraı uıymdastyrý máselesi talqylanǵan. Aýyl turǵyndarynyń suraýy boıynsha balalar ázirshe shaǵyn ortalyqqa ornalastyrylady.
Óńirlik tótenshe jaǵdaılar departamenti órttiń shyǵý sebepteri áli de anyqtalyp jatqanyn málimdedi. Olardyń esebinshe, órttiń aýmaǵy 130 sharshy metrdi quraǵan.
Eske sala keteıik, SQO-da turǵyn úı órtenip, oqıǵa ornynan 2 adamnyń denesi tabylǵanyn jazǵan edik.