Pavlodarda qatty turmystyq qaldyqtardy shyǵarý tarıfi ózgeredi

PAVLODAR. KAZINFORM - Jańa tarıf 14 naýryzdan qoldanysqa engiziledi. Ózgeris kommýnaldyq qyzmettiń sapasyn artyrýǵa negiz bolmaqshy.

Pavlodar qalalyq máslıhaty qatty turmystyq qaldyqtardy shyǵarý tarıfin 9 %-ǵa ósirý týraly sheshim qabyldady.

Qoqys shyǵarý qyzmeti qunynyń ósýine kommýnaldyq kásiporynǵa jańa kólik quraldary men eýrokonteınerler satyp alý sebep bolǵan. Kommýnaldyq qyzmettiń sapasyn arttyrý ári qoqysty suryptap jınaý mádenıetin engizý úshin belgili bir shyǵyndar qajet etilip otyr. Qalalyq máslıhat depýtattary «Spetsmashın» JShS-niń usynys-tilegin tyńdaı kele, tarıfti kóterýge sheshim qabyldaǵan.

«Tarıften túsetin qarajat qatty turmystyq qaldyqtardy jınaý, shyǵarý, suryptaý jáne kómý qyzmetteri boıynsha jumystardy sapaly uıymdastyrýǵa negiz bolady. Buǵan qosa ınflıatsııanyń áseri, janar-jaǵarmaıdyń qymbattaýy da bar. Ótken jyly «Spetsmashın» bizben birlesip qoqys oryndaryn abattandyrdy. Oǵan qosa 18 kólik satyp alyp, shtattaǵy qyzmetkerler sanyn arttyrdy. Buryn qoqys shyǵarý jumystaryna eki adam qajet bolsa, qazir úsh qyzmetker kerek», - deıdi qalalyq turǵyn úı-kommýnaldyq sharýashylyq bóliminiń basshysy Ábilqasym Ospanov.

Jańa tarıf bıylǵy 14 naýryzdan qoldanysqa engiziledi.

Eske sala keteıik, Pavlodarda qoqysty suryptap jınaǵan turǵyndar kommýnaldyq qyzmetke az tóleýi múmkin.