Pavlodarda qatarynan úsh jyl egilgen 3 mln kóshet jersinbeı, qýrap qalǵan
PAVLODAR. KAZINFORM - Pavlodar oblysynda 2021–2023 jyldary otyrǵyzylǵan orman kóshetteriniń jersiný kórsetkishi tómen bolyp, esepten shyǵarylǵan. Atalǵan kezeńde kóshet egýge bıýdjetten 78,2 mln teńge bólingeni belgili bolyp otyr.
Óńirde 2021-2023 jyldary 540,8 gektar jerge 3 mln kóshet otyrǵyzylǵan. Alaıda olar óspeı qalǵan.
Óńirlik jer qoınaýyn paıdalaný, qorshaǵan orta jáne sý resýrstary basqarmasy basshysynyń orynbasary Malıka Elııasovanyń aıtýynsha, 2021-2025 jyldar aralyǵynda Pavlodar oblysynda jalpy aýdany 2,9 myń gektarǵa 16,4 mln kóshet otyrǵyzylǵan.
- 2021-2023 jyldar aralyǵynda otyrǵyzylǵan kóshetter jersinbedi. Baǵalaý nátıjeleri boıynsha kórsetkish 10–23 paıyz aralyǵynda qalyptasqan. Qoldanystaǵy talaptarǵa sáıkes, jersiný deńgeıi 25 paıyzdan tómen orman daqyldary esepten shyǵarylýǵa jatady. Bul maqsatqa bıýdjetten 78,2 mln teńge bólingen, - dep habarlady Kazinform tilshisine Malıka Elııasova.
Mamandar muny eń aldymen óńirdiń tabıǵı-klımattyq erekshelikterimen baılanystyrady. Jaýyn-shashynnyń jetkiliksizdigi, uzaqqa sozylatyn qurǵaqshylyq, aýa temperatýrasynyń joǵary bolýy jáne topyraq ylǵalynyń tapshylyǵy jas kóshetterdiń tamyr júıesiniń qalyptasýyna kedergi keltirýi múmkin. Sonyń saldarynan otyrǵyzylǵan aǵashtardyń kóp bóligi jersinbeı qalǵan. Atalǵan kezeńdegi orman daqyldaryn otyrǵyzý jumystary oblys ákimdigine qarasty úsh orman qorǵaý mekemesiniń aýmaǵynda júrgizilgen. Olar – Pavlodar qalasyndaǵy Pavlodar, Jelezınka aýdanyndaǵy Úrlitúp jáne Tereńkól aýdanyndaǵy Maksım-Gorkıı kommýnaldyq memlekettik mekemeleri.
- Al keıingi jyldary ormandy qalpyna keltirý jumystarynyń kórsetkishteri jaqsara túskenin baıqap otyrmyz. 2024–2025 jyldary oblysta 2 400,1 gektar aýmaqqa 13,7 mln kóshet otyrǵyzyldy. Bul jumystarǵa bıýdjetten 186,4 mln teńge bólingen. Baǵalaý qorytyndysy boıynsha, osy kezeńde orman daqyldarynyń jersiný kórsetkishi 40–50 paıyzdy qurady, - dep atap ótti basqarma ókili.
Bıyl da óńirde aǵash otyrǵyzý jumystary jalǵasyp taýyp, jalpy aýmaǵy 1 325 gektar aýmaqqa 7,5 mln kóshet egilgen. Ormandy qalpyna keltirý úshin negizinen kádimgi qaraǵaı men qaraǵash kóshetteri paıdalanylady. Qaraǵaı kóshetteri Reseıden, al qaraǵash kóshetteri Aqmola oblysyndaǵy «Qazaqstan ormany» JShS tuqymbaǵynan jetkizilgen. Kóshetter aımaqtyń topyraq-klımattyq jaǵdaılaryna sáıkestigi eskerile otyryp tańdalǵan.
Mamandar atap ótkendeı, sońǵy jyldary ormandy qalpyna keltirý jumystarynyń kólemi ulǵaıyp, kóshetterdiń jersiný kórsetkishi de ósken. Deıturǵanmen 2021–2023 jyldardaǵy tómen nátıje óńirdegi orman ósirý isinde klımattyq jaǵdaıdy eskerýdiń, kóshetterdi kútip-baptaý men olardyń jersinýin baqylaýdyń mańyzyn kórsetedi.
Buǵan deıin Pavlodar óńirindegi orman sharýashylyqtarynda 3 mıllıonnan astam aǵash otyrǵyzylǵanyn jazǵanbyz.
