Pavlodarda kásipkerdi bopsalaǵan UQK qyzmetkerine qatysty sotqa deıingi tergeý júrip jatyr
PAVLODAR. KAZINFORM — Pavlodar oblystyq prokýratýrasy ustalǵan azamatqa qatysty Ulttyq qaýipsizdik komıtetiniń Pavlodar oblysy boıynsha departamentimen Qylmystyq kodekstiń 194-babynyń 1-bóligimen bopsalaý faktisi boıynsha sotqa deıingi tergep-tekserý júrgizilip jatqanyn rastady.
Buǵan deıin áleýmettik jelide Ulttyq qaýipsizdik komıtetiniń eki qyzmetkeri bopsalaý deregi boıynsha ustalǵany týraly aqparat tarap ketken edi.
Atalǵan oqıǵa týraly óńirlik ulttyq qaýipsizdik komıtetiniń departamenti jaýap berýden bas tartty. Al polıtsııa departamenti bul derek qosymsha tekserýdi qajet etetindikten jaýap berý ýaqytyn sozatyndaryn málim etti.
Atalǵan jaıt boıynsha Pavlodar oblysynyń prokýratýrasynan mynadaı resmı jaýap keldi.
— Qazirgi ýaqytta Ulttyq qaýipsizdik komıtetiniń Pavlodar oblysy boıynsha departamentimen Qylmystyq kodekstiń 194-babynyń 1-bóligimen bopsalaý faktisi boıynsha sotqa deıingi tergep-tekserý júrgizilýde. Oblys prokýratýrasy «Prokýratýra týraly» Konstıtýtsııalyq Zańymen jáne qylmystyq protsesstik zańnamasymen kózdelgen quzyretteri sheńberinde júrgizilip jatqan sotqa deıingi tergep-tekserýdiń zańdylyǵyn qadaǵalaýdy júzege asyrady. Qazirgi ýaqytta qylmystyq is tergeý satysynda ekenin eskerip, Qylmystyq protsestik kodeksiniń 201-babyna sáıkes basqa málimetter jarııa etýge jatpaıdy, — delingen jaýapta.
Eske sala keteıik, prokýrorlardyń pármenimen bıyl memleketke 716 mlrd teńge qaıtaryldy.