Pavlodarda qarttar úıine aqyly túrde ornalasýǵa bolady
ASTANA. QazAqparat - Pavlodar oblystyq qarttar men múmkindigi shekteýli jandarǵa arnalǵan medıtsınalyq-áleýmettik mekemesinde ashylatyn aqyly bólimshe 12 adamdy qabyldaýǵa daıyn, dep habarlaıdy pavlodarnews.kz.
Bul týraly agenttikke qarttar úıi basshysynyń orynbasary Ǵalııa Jabagına aıtty.
«Byltyrǵy jyly bólimsheniń ashylatyny týraly habarlaǵan kezde 32 adam jazylǵan bolatyn, - deıdi Ǵalııa Jabagına. - Degenmen olardyń keıbireýi ómirden ótip ketse, keıbireýleri basqa jerlerge ornalastyrylǵan. Sondyqtan qazirgi tańda qabyldanatyn adamdardyń tizimi júrgizilýde. Turmysqa qajet tehnıkalar, jıhazdar jáne tósek-oryndarmen jabdyqtalǵan bólmeler sany - segiz. Jospar boıynsha munda 285 oryn qarastyrylǵan. Biz 273 orynǵa qysqartyp, 12 oryndy aqyly qyzmet kórsetý bólimshesi retinde ashyp otyrmyz. Sebebi sońǵy kezderi týystaryn aqyly túrde ýaqytsha qaldyrýǵa nıet bildiretinderdiń tarapynan ótinishter kóp túsýde.
Munda qazirgi tańda 255 adam turyp jatyr. Onyń aıtýynsha, balasy, joldasy nemese týystary bar adamdarǵa qarttar úıinde turýǵa ruqsat berilmeıdi. Al aqyly bólimshelerge zeınetkerlik jasqa jetken jáne resmı túrde birinshi, ekinshi toptaǵy múgedek adamdar qabyldanady. Ornalastyrý quny aıyna 77 myń 468 teńgeni quraıdy.
«Kóbinese jumysbasty, aýqatty azamattar júginedi. Sebebi olar múmkindigi shekteýli jandardy baqylaýsyz úıde qaldyra almaıdy. Bul jerde segiz túrli qyzmet kórsetiledi: tamaqtandyrý, jýyndyrý, bólmeni jáne kıim-keshekterdi tazartý, medıtsınalyq tekserý. Sonymen qatar, olarmen mádenıet qyzmetkeri, psıolog maman, dárigerler men medbıkeler jumys isteıdi. Mundaı aqyly bólimshe elimizde tek Astana qalasynda ǵana bar», - deıdi Ǵalııa Jabagına.
Eske sala keteıik, aqyly bólimshege qarttardy ornalastyrý úshin úsh-alty aı merzimge qyzmet alýshy men onyń týystary, qarttar úıi arasynda úsh jaqty kelisimshart jasalady.
