Pavlodarda kartopqa ústeme baǵany asyryp jibergen jetkizýshi jaýapqa tartyldy

PAVLODAR. KAZINFORM — Óńirlik saýda jáne tutynýshylardyń quqyqtaryn qorǵaý departamenti kartoptyń saýda ústemesin 16,4%-ǵa asyrǵany úshin kóterme jetkizýshini ákimshilik jaýapkershilikke tartty.

Pavlodar oblysynyń ákimdigi óńirdegi 23 sharýashylyqpen jasaǵan memorandým aıasynda fermerler kartopty kılogramyna 100 teńge baǵasymen bosatý boıynsha mindetteme alǵan. Operatorlar ónimdi Pavlodar oblysynyń 59 áleýmettik dúkenine jetkizedi. Kartoptyń dúkenderdegi baǵasy — 120 teńge.

— Bizdiń departament kartop baǵasyna kúndelikti monıtorıng júrgizedi. Áleýmettik mańyzy bar azyq-túlik taýarlaryna, onyń ishinde kartopqa arnalǵan saýda ústemesiniń saqtalýyna memlekettik baqylaýdy júzege asyrady. Búgingi kúni kartoptyń saýda ústemesin asyrǵany úshin bir kóterme jetkizýshi ákimshilik jaýapkershilikke tartyldy. «Rahmet» bazaryna ónimdi turaqty jetkizýshi ústeme baǵany 16,4%-ǵa kóterip jibergen. Al bekitilgen shek — 15%-dan aspaýy kerek. Oǵan eskertý túrinde ákimshilik jaza belgilendi, eger bir jyl ishinde mundaı jaǵdaı qaıtalansa aıyppul salynady, — dep habarlady Pavlodar oblysy boıynsha saýda jáne tutynýshylardyń quqyqtaryn qorǵaý departamenti basshysynyń orynbasary Nursulý Áýbákirova.

Buǵan deıin Pavlodarǵa qymbat kartoptyń qaıdan kelgeni týraly jazǵanbyz.