Pavlodarda qardyń alqyzyl túske boıalýyna boksıt sebep bolýy múmkin
PAVLODAR. QazAqparat - Pavlodarda qardyń alqyzyl túske boıalýyna kásiporynnan boksıttiń taralýy sebep bolýy múmkin. Bul týraly óńirlik kommýnıkatsııalar qyzmetinde ótken baspasóz másıhatynda «Qazaqstan Alıýmınııi» AQ aınalany qorshaǵan ortany qorǵaý departamentiniń basshysy Rınat Sarlybaev aıtty, dep habarlaıdy pavlodarnews.kz.
- Bizdiń shıkizat tabıǵı alqyzyl tústi, - deıdi Rınat Sarlybaev. - Boksıt Krasnooktıabrsk jáne Torǵaı boksıt ken basqarmasynan jetkiziledi. Shańnyń birshama mólsherde jaıylýyna ruqsat beriledi. Bizdiń kásiporynda da normalanǵan kólemde shań taralady. Bul normatıvterge memlekettik sanıtarlyq-epıdemıologııalyq qorytyndysy bar. Ásirese, qys mezgilinde kózge anyq kórinip turady.
Sondaı-aq, Basqarma basshysy kásiporynda ornalasqan tehnıkalyq baqylaý zerthanasy atmosferaǵa ólsheý júrgizgenin atap ótti.
"Eger de kontsentratsııa shamadan tys artqan jaǵdaıda qandaı da bir qaýipti saldary týraly aıtýǵa bolar edi. Alaıda shekti ruqsat etilgen kontsentratsııanyń artýy tirkelmegen", - deıdi spıker.
Aıta keteıik, qala turǵyndarynyń biri M. Gorkıı jáne Marǵulan kósheleriniń boıynda 20-jeltoqsan kúni qardyń alqyzyl túske boıalǵanyn sýretke túsirip alǵan.
