Pavlodarda qarajat tapshylyǵynan qoqys suryptaý tsehi toqtap tur
PAVLODAR. QazAqparat - Kásiporynnyń turalap turýy saldarynan «Spetsmashın» JShS jumyskerleri qoqysty polıgonnan qolmen jınap suryptaýǵa májbúr, dep habarlaıdy pavlodarnews.kz.
«Spetsmashın» JShS ýchaske bastyǵy Aleksandr Popovtyń aıtýynsha, byltyrǵy jyly qoqysty suryptaý tsehine qajet ǵımaratty satyp alyp, jóndeý jasaǵanymen, artynsha qarajat jetispeýinen kásiporyndaǵy jumysty bastamaı jatyp toqtatýǵa týra kelgen.
«Tsehti óz qarajatymyzǵa shamamen alty mıllıon teńgege satyp aldyq. Alaıda qarajat jetispeýinen óndiristi toqtatýǵa týra keldi. Tsehti iske qosý úshin bizge aqsha kerek. Tseh iske qosylǵan jaǵdaıda suryptalatyn qoqystyń túrlerin kóbeıtýge bolady»,- deıdi Aleksandr Popov.
Kommýnalshylardyń sózine qaraǵanda, suryptaý tsehi qosylsa, qalada ornalasqan qoqysty suryptaý jáshikteriniń qajettiligi bolmaıdy - barlyq qoqys tsehte suryptalatyn bolady. Jáshikter ekologııany saqtaý men qoqysty qaıta óńdeý máselesin sheshe almaıdy.
«Turǵyndardyń mentalıteti áli qalyptaspaǵan»,- deıdi olar.
Degenmen, «Spetsmashın» JShS jumyskeriniń kúshimen qoqysty suryptaý isi birtindep alǵa jyljýda.
Aleksandr Popovtyń aıtýynsha, búginde qaladan ákelip tastalatyn qoqystyń nebári 10 paıyzy suryptalýda.
«Qazirgi kezde qoqystyń tórt túri - plastık, qaǵaz, alıýmınıı bankiler men metallolomdy suryptaýdamyz. Plastıktiń ózinen PET shólmekter, tsellofan, shólmekter qaqpaqtary men polıpropılendi tańdap alyp, odan plastıkalyq granýla jasalady. Sapasy tómen qaldyqtardan polımer-qum plıtkalaryn óndiremiz»,- deıdi Aleksandr Popov.
«Spetsmashın» JShS ókiliniń aıtýynsha, suryptalǵan qoqys shıkizat retinde satylady. Máselen, rezına shınalar Taldyqorǵanǵa tasymaldansa, alıýmınııi bankileri - Reseıge saýdalanady. Qaǵaz jergilikti karton-rýberoıd zaýytyna ótkiziledi. Qazirgi kezde qalamyzda 60 jyl buryn uıymdastyrylǵan qoqys polıgonynda shamamen 18 mıllıon tonna qoqys jatyr.
