Pavlodarda qaraýsyz jaıylǵan mal jol apatyna jıi sebep bolady
PAVLODAR. QaAqparat – Jyl basynan beri pavlodarlyq polıtseıler ıesiz jaıylyp júrgen 11 myńnan astam maldy aıyp turaǵyna jiberdi, dep habarlaıdy QazAqparat tilshisi.
«Sońǵy kezderi azamattardyń mal jaıýǵa jaýapsyz qaraý jaǵdaılary jıilep ketti. Oǵan qosa, mal ıeleriniń olardy esh qıyndyqsyz asyraýǵa degen umtylysy basqalar úshin problemaǵa aınalýda. Tipti sońy qaıǵyly jaǵdaıǵa aparyp soǵatyn kezder de bolady. Óıtkeni jolda ıesiz jaıylyp júrgen úı janýarlary jol-kólik oqıǵasyna sebepshi bolyp jatady», – dedi Pavlodar oblysy polıtsııa departamentiniń baspasóz qyzmeti.
Tártip saqshylarynyń málimetinshe, osyndaı apattyń saldarynan balalar ata-anasynan aırylǵan. Keshkilik mezgilde «VAZ-21014» avtokóliginiń 32 jastaǵy júrgizýshisi Lenın-Ertis tasjolynda jylqylardy qaǵyp ketti. Olar jol boıynda jaıylyp júrgen.
«Qaıǵyly apat saldarynan kólik júrgizýshisi alǵan jaraqatynan sol jerde qaıtys boldy. 1990 jyly týǵan jubaıy aýrýhanada kóz jumdy. 2014, 2015 jáne 2017 jyldary týǵan kámeletke tolmaǵan balalar túrli jaraqatpen aýrýhanaǵa jatqyzyldy, – dep tolyqtyrdy departamentte. – Mal ıeleriniń jaýapsyzdyǵynan, shopan jaldap, qarajat jumsamaýy saldarynan bir otbasynyń taǵdyry tálkekke ushyrap, úsh bala jetim qaldy».
Búgingi tańda oblys aýmaǵynda 142 aıyppul turaǵy jumys isteıdi. Tek sońǵy aptanyń ózinde aıyp turaǵyna 90-nan astam mal basy aıdap ákelindi. Olar esh qaraýsyz jaıylyp júrgen.
