Pavlodarda qaraýsyz qalǵan burynǵy onkologııalyq aýrýhana ǵımaratynyń taǵdyry qalaı sheshildi
ASTANA. KAZINFORM – Aýdany shamamen 7 myń sharshy metr ǵımarat sońǵy bes jylǵa jýyq ýaqyt boıy bos tur. Osy jyldar ishinde ǵımarat vandaldardyń is-áreketinen qatty qıraǵan.
Qıraý aldynda tur
Oljabaı batyr kóshesi, 41 mekenjaıynda ornalasqan bes qabatty ǵımarat kóp jyl boıy Pavlodar oblysy densaýlyq saqtaý basqarmasynyń balansynda bolǵan. Bul jerde 2019 jylǵa deıin onkodıspanser jumys istedi. Kóptegen naýqas dertinen aıyǵýǵa degen úmitpen dál osy jerge kelgen, biraq, ókinishke qaraı, bárine birdeı kómektese almady. 2019 jyly Pavlodarda quny 7,2 mlrd teńge turatyn jańa oblystyq onkologııalyq dıspanser salyndy. Sonyń nátıjesinde eski ǵımaratqa degen qajettilik bolmady.
Pandemııa bastalǵan kezde bul nysandy ýaqytsha provızorlyq gospıtal retinde paıdalanýǵa sheshim qabyldandy. Ǵımaratqa jóndeý júrgizilip, 300 naýqasqa deıin qabyldaý múmkindigi paıda boldy. Alaıda kóp uzamaı jańa ınfektsııalyq gospıtal salyndy, pandemııa da aıaqtaldy. Sonyń saldarynan dárigerler bul jerden tolyq kóship ketti.
Osylaısha ǵımarat bos qaldy jáne odan ári qandaı maqsatta paıdalanýǵa bolatyny uzaq ýaqyt anyqtalmady. Buǵan qosa, nysandy kútip-ustaýǵa jaýapty organ da belgilenbegendikten, kúzet qoıylmaǵan. Nátıjesinde bul jerdi oqýshylar men stýdentter ıemdenip, ishine kirip, ondaǵynyń bárin qıratýǵa deıin barǵan.
Qazir ǵımarattyń dálizderi men burynǵy palatalaryna kirseńiz, ol jerde adamdar emdelgenin elestetý qıyn. 2020 jyly ıaǵnı pandemııa kezinde provızorlyq gospıtal ashar aldynda jóndeý jumystary júrgizilgen.
Bıyl ıesiz ǵımarattyń taǵdyryna qaıta nazar aýdaryldy. Qalalyq bılik ony bolashaq pedagogterge berýge sheshim qabyldady. Bul protsedýra birneshe aıǵa sozyldy.
Burynǵy onkologııalyq dıspanserdiń ákimshilik ǵımaraty Pavlodar oblysynyń kommýnaldyq menshiginen mınıstrliktiń balansyna berildi. Bul týraly Pavlodar oblysy ákimdiginiń № 61/1 qaýlysynda (25.02.2025 j.) kórsetilgen. Ǵımarat Álkeı Marǵulan atyndaǵy Pavlodar pedagogıkalyq ýnıversıtetiniń negizgi kampýsyna jaqyn ornalasqan. Qazir ony ýnıversıtet balansyna berý protsesi júrip jatyr. Berilgenge deıin ǵımarat ýnıversıtettiń ýaqytsha jaýapty saqtaýyna tapsyrylǵan. Ýnıversıtet nysan men oǵan irgeles aýmaqty táýlik boıy kúzetýdi qamtamasyz etip otyr, - dep jaýap berdi Ǵylym jáne joǵary bilim mınıstrligi resmı saýalǵa.
Osylaısha, ǵımarat jańa ıesin tapty, qazir ol táýlik boıy kúzet qaraýynda. Degenmen mamandardyń aıtýynsha, qalpyna keltirý qıyn, qaıta qalpyna keltiretindeı eshteńe qalmaǵan.
Qandaı nusqalar qarastyrylyp jatyr
Álkeı Marǵulan atyndaǵy Pavlodar pedagogıkalyq ýnıversıtetinde ǵımaratty qalaı paıdalaný kerektigi jóninde áli naqty sheshim qabyldanǵan joq. Bir nárse aıqyn, bul aýmaqta stýdentterge arnalǵan jataqhana bolady. Sonymen qatar ýnıversıtet tehnıkalyq zertteý júrgizý úshin saraptamalyq uıymdy jaldaǵan. Zertteý qorytyndysy boıynsha ǵımarat pen onyń qurylymdary shekteýli jumysqa jaramdy jaǵdaıda.
Keı jerlerinde aqaý men apatty bólikter bar, biraq tireýish konstrýktsııalar jaramdy. Alaıda aldaǵy jóndeý jumystaryna ketetin shyǵyn jańa ǵımarat salý qunynan asyp ketýi múmkin.
- Ǵımarat 1960 jyly salynǵan, negizgi materıaly qum blok, ıaǵnı ǵımarat moraldyq turǵydan eskirgen, degenmen fızıkalyq turǵydan qaıta jańartýǵa bolady. Biraq rekonstrýktsııa eleýli qarjy resýrsyn qajet etedi. Búginde qoǵamdyq ǵımarattarǵa, ásirese jataqhanalarǵa qoıylatyn talaptar aıtarlyqtaı ózgerdi. Mysaly, ınklıýzıvti orta talaptaryn da eskerýimiz qajet. Bul degenimiz keń baspaldaq, esikterdiń keń oıyqtary, stýdentterge qolaıly sanıtarlyq bólmeler jáne taǵy basqa kóptegen mańyzdy bólshek qamtylýy tıis, - dep túsindirdi Álkeı Marǵulan atyndaǵy Pavlodar pedagogıkalyq ýnıversıtetiniń prorektory Serik Іlııasov.
Ýnıversıtet ókilderiniń aıtýynsha, sońǵy sheshim áli qabyldanǵan joq. Onyń ústine nysannyń oqý ornynyń balansyna tolyq berilý protsesi aıaqtalǵan soń, másele naqty ári jan-jaqty qarastyrylady. Alaıda aldyn ala boljam boıynsha, eger ekonomıkalyq turǵydan tıimdisi eski ǵımaratty buzyp, jańasyn salý bolsa, sol sheshim qabyldanady.
Bıyl Álkeı Marǵulan atyndaǵy Pavlodar pedagogıkalyq ýnıversıtetinde shamamen 4 500 stýdent bilim alyp jatyr. Ýnıversıtettiń eki jataqhanasy bar, olardyń jalpy syıymdylyǵy shamamen 1 500 oryn. Biri 1970 jyldary salynǵan, ekinshisi 2015 jyly paıdalanýǵa berilgen jańa ǵımarat. Alaıda qoldanystaǵy normalarǵa saı, qosymsha oryndar qajet.
- «Bilim týraly» zańnyń talaptaryna sáıkes, joǵary oqý orny retinde oqý nysanyna qaramastan, barlyq basqa óńirden kelgen stýdentterdi jataqhanamen qamtamasyz etýge mindettimiz. Bizdiń ýnıversıtette basqa óńirden kelgen stýdentterdiń naqty sanyn eskersek, qajettilikti tolyq jabý úshin taǵy 910 tósek-oryn qajet. Qazir tapshylyq máselesi joq, óıtkeni kóptegen stýdent týystarynda turady nemese páter jaldaıdy. Degenmen ýnıversıtettiń damý perspektıvasyn, talapkerler sanynyń ósýin eskere otyryp, qajettilikti mindetti túrde jabýymyz kerek, - deıdi prorektor.
2019 jyly ýnıversıtet Lermontov kóshesinde jańa jataqhana salýǵa talpynys jasaǵan edi. Qurylysty kásipkermen kelisimshart aıasynda júzege asyrý josparlanǵan bolatyn. Alaıda jer telimin tańdaý máselesi pavlodarlyqtar arasynda qyzý pikirtalas týǵyzdy. №34 mektepke tıesili jerdiń bir bóligi shegerilip, qurylysqa berilgen. Ol kezde sheneýnikter bul aýmaqty artyq jer dep tanyp, aýktsıon arqyly satqan. Olar stýdentterge qajetti jataqhana qysqa merzimde salynyp bitedi, tipti 2020 jyldyń sáýirinde daıyn bolady dep sendirgen.
- Ol ýaqytta men prorektor qyzmetinde bolmadym, biraq qujattardy zertteı kele aıtarym ınvestor is júzinde qurylys jumystaryn toqtatyp qoıǵan. Nysannyń toqyrap, aıaqtalmaı qalý qaýpi týyndady. Kásipker memleket-jekemenshik áriptestik jónindegi konsortsıýmdy birjaqty tártippen buzǵan. Keıin ol nysandy basqa kásipkerge satqan, - dep túsindirdi ýnıversıtet prorektory Serik Іlııasov.
Nátıjesinde ǵımarat salynyp bitti, qazir kóppáterli turǵyn úı. Ýnıversıtet óz seriktesin mindettemelerin oryndaýǵa májbúrleý úshin sotqa birneshe ret júgingen, alaıda barlyq sotta jeńilis tapqan. Endi burynǵy onkologııalyq aýrýhana ǵımaraty stýdentterge arnalǵan oryn tapshylyǵyn ishinara toltyrýy tıis.
Sonymen qatar ýnıversıtet ókilderi bul joly mundaı jaǵdaı qaıtalanbaıtynyna sendirip otyr. 2019 jyly qurylys kásipkerge tıesili jer teliminde júrgizilse, qazirgi jaǵdaıda jaǵdaı múlde basqa. Jer ýnıversıtet balansyna berilý protsesinde, sondyqtan bul aýmaqta jataqhanadan ózge eshteńe salynbaıdy.
Aıta ketsek, keshe Pavlodarda salynyp jatqan mekteptiń tóbesi opyrylyp, birneshe adam zardap shekti.
Búgin Pavlodarda qulaǵan mektep ǵımaratynyń astynan adamnyń denesi tabylǵany habarlandy.