Pavlodarda qarasha aıy klımattyq normadan 2 gradýsqa jyly bolady
PAVLODAR. KAZINFORM — Pavlodar oblysynda qarasha aıynda ortasha aýa temperatýrasy klımattyq normadan 2 gradýsqa joǵary bolady. Sonymen qatar óńirde jaýyn-shashyn mólsheri de normadan artyq túsýi múmkin.
«Qazgıdromet» mamandarynyń málimetine qaraǵanda, qarasha aıyndaǵy ortasha aýa temperatýrasynyń klımattyq normasy — 4,9…-6,8 gradýs aralyǵynda.
Aıdyń basynda túnde aýa temperatýrasy -3…+7 gradýs, kúndiz +2…+12 gradýs bolady dep boljanyp otyr.
Odan soń kún azdap sýytyp, túnde -3…-8 gradýsqa deıin tómendeıdi. Oblystyń soltústiginde -11 gradýs aıaz bolýy yqtımal. Kúndiz aýa temperatýrasy 0…-5 gradýs aralyǵynda bolady.
— Qarasha aıynyń alǵashqy onkúndiginiń sońynda aýa raıy qaıta jylynady. Túnde -3…+2 gradýs, kúndiz +2…+7 gradýs jyly bolady. Keıin temperatýra tómendep, túnde -3…-13 gradýs, kúndiz +2…-7 gradýs aıaz kútiledi. Aı ortasyna taman temperatýra taǵy qubylyp, túnde -1…-10 gradýs, kúndiz +1…-6 gradýs aralyǵynda bolady. Al aıdyń sońynda birtindep sýytady. Túnde -1…-15 gradýs, kúndiz +1…-10 gradýs aıaz boljanyp otyr, — dep habarlady «Qazgıdromet» mekemesinen.
Sınoptıkterdiń málimetinshe, qarasha aıyndaǵy jaýyn-shashyn mólsheri klımattyq normadan joǵary bolady. Aı basynda jańbyr, ortasy men sońynda qar jaýýy múmkin. Sondaı-aq boran soǵyp, kóktaıǵaq qalyptasýy yqtımal. Keı kúnderi jyldamdyǵy sekýndyna 15-20 metrge deıin jetetin jel soǵýy múmkin.
Eske salaıyq, Aqmola oblysynda qarasha jyly bastalyp, aı sońynda aıaz kúsheıetinin habarlaǵan edik.
