Pavlodarda qaraqshylyq jasap, 27 jyl boıy izdeýde júrgen kúdikti Máskeýde ustaldy

ASTANA. KAZINFORM – Pavlodarda 1999 jyly jasalǵan qaraqshylyq shabýylǵa baılanysty 27 jyl boıy izdeýde júrgen adam Reseı astanasy Máskeýde ustaldy, dep habarlady Polisia.kz.

v
Foto: Kazinform/JI

Pavlodar oblysynyń polıtsııa departamenti prokýratýramen birlesip, qylmystyq jaýapkershilikten jaltaryp júrgen adamdardy, onyń ishinde Qazaqstannan tys jerlerde jasyrynǵan kúdiktilerdi anyqtaý jáne ustaý boıynsha jedel-izdestirý is-sharalaryn turaqty túrde júrgizip keledi.

2026 jyldyń alǵashqy 10 aıynda oblysta barlyǵy 82 adam izdeýde bolǵan. Onyń 62-sine bıyl polıtsııanyń aýmaqtyq bólimsheleri izdeý jarııalaǵan.

Qabyldanǵan sharalardyń nátıjesinde izdeýde júrgen 73 adam anyqtaldy. Olardyń bireýi adam óltirý, úsheýi qaraqshylyq shabýyl, taǵy úsheýi tonaý derekteri boıynsha izdestirilgen.

– Sonymen qatar qabyldanǵan sharalar nátıjesinde oblys aýmaǵynda shet memleketterdiń quqyq qorǵaý organdary izdestirip jatqan 31 qylmysker anyqtaldy. Sondaı-aq Qazaqstan Respýblıkasynan tys jerlerde shetel memleketteriniń aýmaǵynda jasyrynyp júrgen 7 qylmysker anyqtaldy, – dedi Pavlodar oblysy polıtsııa departamenti krımınaldyq polıtsııa basqarmasynyń bastyǵy Jasulan Tanjanov.

Atap aıtqanda, Pavlodar oblysy krımınaldyq polıtsııa basqarmasynyń jedel-izdestirý toby Reseı ІІM qyzmetkerlerimen birlesip júrgizgen arnaıy is-shara barysynda Máskeý qalasynda uzaq ýaqyt boıy izdeýde júrgen adamdy ustady.

Ol 1999 jyldan beri Pavlodar qalasynda jasalǵan qaraqshylyq shabýylǵa baılanysty polıtsııadan boı tasalap kelgen.

Vedomstvo málimetinshe, izdeýde júrgen adamdardy anyqtaý jáne ustaý polıtsııanyń jedel-qyzmettik jumysynyń basym baǵyttarynyń biri sanalady. Bul sharalar jazanyń bultartpastyǵy qaǵıdatyn qamtamasyz etý maqsatynda turaqty túrde júrgiziledi.

Aıta keteıik, buǵan deıin Pavlodarda 2006 jyly jasalǵan qaraqshylyq shabýylǵa qatysy bar degen kúdikpen 20 jyl boıy izdeýde júrgen azamat Reseıden Qazaqstanǵa ekstradıtsııalanǵan edi.