Pavlodarda qar tazalaýǵa kedergi kólikterdi evakýatorlarmen áketilýde
PAVLODAR. QazAqparat - Pavlodarda qar tazalaýǵa kedergi bolǵan kólikterdi evakýatorlarmen «kóterip áketýde», dep habarlaıdy pavlodarnews.kz.
Búgingi qalalyq TÚKSh bólimi jáne jergilikti polıtsııa qyzmeti reıd barysynda polıtsııa qyzmetkerleri joldardy qardan tazartý jumystaryna kedergi jasap turǵan kólikterdi aıyppul turaǵyna áketýmen aınalysty.
«Pavlodarda qalyń qar túsýine baılanysty polıtsııa qyzmetkerleri turǵyn úı-kommýnaldyq sharýashylyǵyna kómekke kelip otyr, - dedi jergilikti polıtsııa qyzmeti basshysynyń orynbasary Arman Ashrenov. - Osylaısha, biz qar tazalaýǵa kedergi jasap turǵan jáne tyıym salynǵan jerlerge kólikterin qoıǵan júrgizýshilermen sóılesip, keıbireýin aıyppul turaǵyna áketip jatyrmyz. Mysaly, Krýpskaıa kóshesi boıynda qazir reseılik nómirleri bar «VAZ» avtokóligin turaqqa áketýge týra keledi. Sebebi, júrgizýshi temir tulparyn dál joldyń ústinde qoıǵan jáne kóliktegi qarǵa qarasaq, osy jerde birneshe kún boıy qozǵalyssyz turǵan kórinedi. Jalpy, eki kúnniń ishinde bes kólik turaqqa jetkizildi. Jol erejesin buzǵan júrgizýshiler 5 AEK kóleminde aıyppul tóleýi tıis jáne turaqta turǵan ár kúnge 300 teńgeden shyǵyndanatyn bolady».
Aıta keterligi, kommýnaldyq sharýashylyq qyzmetkerleri qar jaýǵannan beri táýlik boıy jumys isteýde. Qazirgi ýaqytta qala joldary tolyqtaı qardan tazartylyp, jınalǵan úıindiler shyǵaryla bastady. Jalpy qala kóshelerine 200-ge jýyq jumysshy men 150 tehnıka shyqqan.
