Pavlodarda qar qursaýynda qalǵan balyqshylar qutqaryldy

PAVLODAR. KAZINFORM — Qutqarylǵan qos azamat Ekibastuz qalasyna jetkizilgen. Olarǵa medıtsınalyq kómek qajet bolmaǵan.

— 112 qyzmet pýltine Pavlodar oblysyndaǵy Básentın kóliniń mańynda jeńil avtokólik qar qursaýynda qalyp qoıǵany, kólik salonynda eki adam bary týraly aqparat tústi. Jolaýshylar balyq aýlaý maqsatymen shyqqan. Alaıda qalyń qarda kólikteri turyp qalyp, óz betterimen shyǵa almaǵan, — dep habarlady óńirlik tótenshe jaǵdaılar departamentinen.

Departamenttiń qutqarýshylary qajetti qutqarý jabdyqtarymen tolyq jabdyqtalǵan arnaıy tehnıkamen dereý kómekke shyqqan. Qalyń qar men joldyń qıyndyǵyna qaramastan, qutqarýshylar oqıǵa ornyna barynsha jedel jetip, qar qursaýynda qalǵan eki balyqshyny evakýatsııalady. Qutqarylǵan eki er adam Ekibastuz qalasyna jetkizilgen, olar medıtsınalyq kómekti qajetsinbedi.

Eske sala keteıik, Qaraǵandy oblysynda qutqarýshylar qar qursaýynda qalǵan 12 adamdy qutqardy.