Pavlodarda kanalǵa shomylýǵa barǵan jasóspirim sýǵa batyp ketti
PAVLODAR. KAZINFORM - Pavlodar oblysynyń Aqkól aýylynda 2009 jyly týǵan er bala sýǵa batyp kóz jumdy.
Jasóspirim tyıym salynǵan jerde sýǵa túsken. Bul týraly Pavlodar oblysy tótenshe jaǵdaılar departamentiniń baspasóz qyzmetinen habarlady.
- Ekibastuzǵa qarasty Aqkól aýylynda bolǵan qaıǵyly oqıǵa týraly habarlama 2 maýsym kúni saǵat 15.40-ta kelip túsken. Ekibastuz qalasy tótenshe jaǵdaılar bóliminiń qutqarýshylary shuǵyl túrde kólge baryp, súńgýirlik-qutqarý jumystaryn júrgizdi. Jasandy kanalda súńgýirlik-izdestirý jumysyn júrgizý barysynda (sýarý arnasynda) saǵat 17.00-de 2009 jyly týǵan kámeletke tolmaǵan balanyń denesi tabyldy. Kýágerlerdiń aıtýynsha, jasóspirim tyıym salynǵan jerde shomylǵan. Jaǵdaıdyń mán-jaıy anyqtalyp jatyr, - dep habarlady departamentten.
Departament mamandary turǵyndarǵa sý aıdyndarynda qaýipsizdik sharalaryn qatań saqtaýǵa jáne shomylýǵa tyıym salynǵan sý aıdyndarynda sýǵa túspeýdi eskertedi.
Eske sala keteıik, Pavlodarda jaǵajaılar resmı túrde búginnen bastap ashylady.