Pavlodarda qamshy órý óneri jańǵyrdy
PAVLODAR. KAZINFORM — Oblys ortalyǵynda qamshy órýden saıys ótti. Qatysýshylar umyt bolyp bara jatqan ulttyq ónerdi qaıta jańǵyrtyp, qaıys taspalarynan túıin túıýden sheberlikterin kórsetti.
Buqar jyraý atyndaǵy ádebıet jáne óner mýzeıi mektep oqýshylarynyń qolónerge degen qyzyǵýshylyǵyn arttyrýǵa den qoıyp keledi.
— Saıysty Naýryz meıramyna oraı uıymdastyrdyq. Qamshy órý ónerin nasıhattaý arqyly er balalardy ulttyq qolónerdi kúndelikti ómirde qoldana bilýge úıretý, shyǵarmashylyqqa jeteleý, izdenisin damytý, qazaqtyń ulttyq ónerine degen jastardyń zeıinin arttyrý kózdeldi, — deıdi mýzeı basshysy Erbol Qaıyrov.
Baıqaý eki kezeńnen turdy. Alǵashqysynda 10 qatysýshy qazylar alqasyna ózi órip ákelgen qamshylaryn tanystyryp, jasalý ádisterin baıandady. Al ekinshi kezeńge ótken 5 qatysýshy qaıys taspalarynan qamshy órý sheberlikterin kórsetti.
— Men jastaıymnan jylqy baqqan adammyn. Halqymyz ejelden jigittiń bes qarýy boıynda bolýy kerek dep bilgen. Qamshynyń qasıetin, qoldaný ereksheligin úlkenderden úırenip, jadymyzǵa túıip óstik. Máselen, jylqyshylar qamshynyń búldirgisin sabynyń eń ushynan salady. Sebebi jylqyǵa buǵalyq salý kezinde qamshyny sol qolymyzǵa ustaýǵa yńǵaıly, — deıdi qamshy órýdiń sheberi, qazylar alqasynyń múshesi Jańbyrbaı Áýbákirov.
Baıqaý qorytyndysynda Y. Altynsarın atyndaǵy daryndy balalarǵa arnalǵan oblystyq qazaq gımnazııa-ınternatynyń 10 synyp oqýshysy Bıjan Tasqynuly jeńimpaz atandy. Pavlodar qalasynyń № 29 orta mektebiniń oqýshysy Samat Nursultan ekinshi, Álıhan Bókeıhan atyndaǵy lıtseı-mektebiniń oqýshysy Qabdolbek Aıat úshinshi orynǵa ıe boldy.
Eske sala keteıik, Kókshetaýda Ulttyq kıim festıvali ótti.