Pavlodarda kámelet jasyna tolmaǵan qyz ben baýyryn zorlaǵan qos er adam sottaldy

PAVLODAR. KAZINFORM — Sot olardyń birin 22 jylǵa, ekinshisin 15 jylǵa bas bostandyǵynan aıyrdy. 

Pavlodar oblysy qylmystyq ister jónindegi mamandandyrylǵan aýdanaralyq soty on alty jasqa tolmaǵan adammen jynystyq qatynasqa túsý jáne seksýaldyq sıpattaǵy ózge de áreketterdi jasaý derekteri boıynsha qylmystyq isti qarady. Іstiń mán-jaıyn zańmen jarııa etý múmkin bolmaǵandyqtan, is jabyq sot otyrysynda qaraldy.

Belgili bolǵandaı, kámelet jasyna tolmaǵan qyz 2018 jyly zorlyq-zombylyqqa ushyraǵan. Ol tusta jasy 10-da bolǵan. Al kúdiktiniń ózi de ol ýaqytta kámeletke tolmaǵan. Keıinirek qyzdyń baýyry da zorlyqshylardyń qurbanyna aınalǵan. Sumdyq oqıǵa týraly tek 2024 jyly ǵana belgili bolǵan. Sol tusta zorlyq jasaýshynyń jalǵyz bolmaǵany, oqıǵaǵa taǵy bir er adamnyń qatysqany anyqtalǵan.

— Kúdikti retinde ustalǵan qos er adamnyń kinási sotta jábirlenýshilerdiń, kýálardyń aıǵaqtarymen, sot saraptamasynyń qorytyndylarymen jáne sotta zerttelgen basqa da dáleldemelermen dáleldendi. Sottalýshylardyń jasaǵan qylmystary asa aýyr qylmystar sanatyna jatady jáne tek bas bostandyǵynan aıyrý túrindegi jazany qarastyrady. Sot jazany jeńildetetin mán-jaılardy eskere otyryp, G.-ǵa 22 jylǵa, al Ó.-ge 15 jylǵa bas bostandyǵynan aıyrý jazasyn taǵaıyndady, — dep habarlady oblystyq sottyń baspasóz qyzmetinen.

Sottalǵandardyń ekeýi de pedagogıkalyq jáne kámeletke tolmaǵandarmen jumys isteýge baılanysty laýazymdarmen aınalasý quqyǵynan ómir boıyna aıyryldy. Jábirlenýshiler ókiliniń moraldyq shyǵyndy óndirý týraly talap qoıýy tolyǵymen qanaǵattandyryldy.

Úkim zańdy kúshine engen joq.

Eske sala keteıik, 2024 jyldyń qarasha aıynda Baıanaýyldyń Maıqaıyń kentinde baýyry men qaryndasy jynystyq zorlyqqa ushyraǵany belgili boldy. 

Keıin balalardy zorlaý deregi boıynsha polıtsııa qylmystyq is qozǵap, tergeý bastaldy.