Pavlodarda KamAZ karerge qulap, eki adam qaza boldy
PAVLODAR. QazAqparat – Júk kóliginiń júrgizýshisi ony bir fırmanyń aýmaǵynda artqa qaraı júrgizgen, dep habarlaıdy QazAqparat tilshisi.
«5 qarasha kúni saǵat 08.00-de Pavlodarda jaýapkershiligi shekteýli seriktestikterdiń biriniń aýmaǵynda «KamAZ» avtokóliginiń 59 jastaǵy júrgizýshisi jumystan tys ýaqytta artqa júrgizý kezinde kólikti karerge (tereńdigi - alty-jeti metr) aýdaryp alǵan» dep habarlady jýrnalısterge Pavlodar oblysy polıtsııa departamentiniń baspasóz qyzmeti.
Oqys oqıǵa saldarynan kólik júrgizýshisi men ishindegi jolaýshy mert boldy.
«Sot-medıtsınalyq saraptama taǵaıyndaldy. Tekserý júrip jatyr» dep atap ótti vedomstvo ókilderi.
