Pavlodarda qaldyqtardy zańsyz kómip kelgen kásiporynǵa 28 mlrd aıyppul salyndy

PAVLODAR. KAZINFORM —  Pavlodardaǵy kásiporyn qaldyqtardy kómý lımıtin asyrǵany úshin 28 mlrd teńgege aıyppul salyndy.  Bul týraly Pavlodar oblysynyń prokýratýrasynyń baspasóz qyzmeti habarlady. 

Tabıǵatty qorǵaý prokýratýrasy ekologııalyq zańnamanyń saqtalýyna taldaý júrgizý barysynda ruqsat qujattarynyń talaptarynyń oryndalmaǵany anyqtaldy.

Osy derek boıynsha tekserýler bastalyp, nátıjesinde ekologtar «EkoAlem-PV» JShS-niń qyzmetinde turmystyq qatty qaldyqtardy ornalastyrý kóleminiń belgilengen lımıtten asqany anyqtaldy.

Atalǵan quqyq buzý boıynsha sýbekt Ákimshilik quqyq buzýshylyq týraly kodekstiń 328-babynyń 6-bóligine sáıkes ákimshilik jaýapkershilikke tartyldy.

— Bul baptyń sanktsııasy qaldyqtardy kómý tóleminiń stavkasyna qatysty on myń paıyz mólsherinde, ıaǵnı belgilengen lımıtten tys jınalǵan nemese kómilgen qaldyqtar kólemine sáıkes aıyppul salýdy kózdeıdi. Nátıjesinde aıyppul somasy 28,4 mıllıard teńge boldy, — delingen habarlamada.

Apellıatsııalyq saty alǵashqy ınstantsııa sotynyń seriktestikti ákimshilik jaýapkershilikke tartý týraly qaýlysyn ózgerissiz qaldyrdy. 

Aıta ketelik kómirsýtek salasynda quqyq buzǵandarǵa 50 mlrd teńge aıyppul salynǵan edi.