Pavlodarda qala syrtyndaǵy trassadan alty jasar bala tabyldy
PAVLODAR. QazAqparat - Pavlodarda 6 jasar bala 25 shaqyrym qashyqtyqtaǵy úıine jaıaý jetpek bolǵan, dep habarlaıdy QazAqparat tilshisi.
Ony polıtseıler jol boıynan taýyp alǵan.
«Pavlodar oblystyq polıtsııa departamenti jergilikti polıtsııa qyzmeti patrýldik rotasynyń polıtseıleri maıor Almas Baıymbet pen aǵa leıtenant Álisher Latypov ádettegideı qyzmetine kirisip, «Pavlodar - Ýspenka» avtojolyn patrýldeýge shyqqan. Joldyń 28-shaqyrymynda, Efremovka aýylynyń mańynda tasjoldyń jıegimen ketip bara jatqan balany baıqap qalǵan. Polıtseıler birden toqtap, balanyń esimin, onyń jol boıynda ne istep júrgenin suraǵan. Alty jasar Nurdáýlettiń aıtýynsha, ol týystarynyń úıinen shyǵyp 25 shaqyrym qashyqtyqta, Korıakovka aýylyndaǵy óz úıine bet alǵan», - dedi polıtsııa Departamentiniń baspasóz qyzmetinen.
Polıtseıler kezekshilik bólimine habarlasyp, bolǵan oqıǵany baıandaǵan jáne balany úıine deıin jetkizip tastaǵan.
«Úıinde eshkim bolmaǵan, esikte qulyp turǵan. Keıin balany Pavlodar aýdandyq polıtsııa bólimine alyp barǵan. Onyń ata-anasynyń jeke-basyn anyqtap, ákesine habar berdi», - dedi quqyqqorǵaý organdarynda.
Balanyń ákesi ulynyń mundaı jaǵdaıǵa tap bolǵanyn bilmegen. Ol baldyrǵandy alyp ketý úshin polıtsııa bólimine baryp, qyzmetkerlerge alǵys aıtty.
Avtory Anton Gagarın
