Pavlodarda K5 benzınine qajetti alkılat óndiretin zaýyt salynyp jatyr
ASTANA. KAZINFORM — Pavlodarda alkılat óndiretin jańa zaýyt 2027 jyly iske qosylady, dep habarlaıdy Energetıka mınıstrliginiń baspasóz qyzmeti.
Energetıka mınıstrligi munaı-gaz-hımııa salasyn damytý, kómirsýtek shıkizatyn tereń óńdeýdi keńeıtý jáne qosylǵan quny joǵary ónim óndirý boıynsha jumysty jalǵastyryp keledi. Osyndaı jobalardyń biri — Pavlodar qalasynda alkılat óndiretin zaýyttyń qurylysy. Quny 35,5 mlrd teńgeni quraıtyn ınvestıtsııalyq jobany «INTERTRANS C.A.» JShS júzege asyryp jatyr.
Qazir qurylys alańynda belsendi jumystar júrgizilip keledi. Atap aıtqanda, sý deńgeıin tómendetý jumystary júrgizilip, taýarlyq parkter men sorǵy stantsııalaryna arnalǵan irgetastar turǵyzylyp jatyr, sondaı-aq ákimshilik ǵımarattar salynyp jatyr.
— Joba jylyna 110 myń tonna býtan-býtılen fraktsııasynan 97,6 myń tonna alkılat óndirýdi kózdeıdi. Alkılat — joǵary oktandy ári ekologııalyq taza motor otynynyń komponenti, ol K5 standartyna sáıkes keletin benzın óndirýde paıdalanylady, — delingen mınıstrlik habarlamasynda.
Jobany iske asyrý kómirsýtek shıkizatyn tereńirek óńdeýdi qamtamasyz etip, munaı-gaz-hımııa salasy ónimderiniń qosylǵan qunyn arttyrýǵa múmkindik beredi.
Aıta keteıik, negizgi ótkizý naryǵy joǵary oktandy benzın óndiretin otandyq zaýyttar bolady. Sonymen qatar eksporttyq jetkizilimder de qarastyrylǵan.
Qurylys kezeńinde 500-ge deıin jumys orny ashylady. Kásiporyn jobalyq qýatyna shyqqannan keıin 178 turaqty jumys orny qurylady.
Negizgi tehnologııalyq jabdyqtardy jetkizý 2026 jyldyń IV toqsanyna josparlanǵan. Zaýytty paıdalanýǵa berý 2027 jyldyń IV toqsanynda josparlanyp otyr.
Qazaqstanda óndiris kólemin ulǵaıtý jáne munaı-gaz-hımııa salasyn damytý maqsatynda birqatar iri joba iske asyrylady. Olardyń qatarynda karbamıd, býtadıen jáne polıetılen óndirý jobalary bar. Bul jobalardy iske asyrý kómirsýtek shıkizatyn tereń óńdeýdi keńeıtýge, salanyń eksporttyq áleýetin arttyrýǵa jáne tıisti ónimder boıynsha eldiń ishki qajettilikterin tolyq qamtamasyz etýge múmkindik beredi.
Osyǵan deıin Qazaqstan munaı-gaz hımııasyna 15 mlrd dollar ınvestıtsııa tartýdy kózdep otyrǵanyn jazdyq.
