Pavlodarda ıisshil ıtterdiń kómegimen 200-den astam qylmys ashylǵan

PAVLODAR. KAZINFORM — Pavlodar qalasyndaǵy kınologııalyq ortalyqta 28 qyzmettik-izdestirý ıtteri bar. Olar ótken jyly myńnan astam shaqyrtýǵa qatysyp, 210 qylmysty ashýǵa úles qosqan.

Óńirlik polıtsııa departamentiniń kınologııalyq ortalyǵy qylmyspen kúres jumystaryna eleýli úles qosyp, ártúrli qylmystardy anyqtaý men ashýǵa kómektesýdi jalǵastyryp keledi. Qyzmettik ıtter — qarý-jaraq pen esirtki zattaryn anyqtaýdyń eń tıimdi joly. Sondaı-aq aýyr qylmystardy ashýǵa kóp kómegi tıip otyr.

— Ótken jyly qyzmettik ıtterdiń kómegimen 130 kılogramnan astam esirtki zattarynyń zańsyz aınalymǵa túsýine jol berilgen joq. Árbir polıtsııa-kınologynyń negizgi mindeti — qyzmettik ıtti oqıǵa ornynda nemese jedel-izdestirý is-sharalary kezinde qoldanýǵa daıyn bolý. Bizdiń qyzmette kezdeısoq adamdar bolmaıdy, óıtkeni bizdiń qyzmettiń negizinde janýarlarǵa degen mahabbat jatyr. Eńbeksúıgishtik, tózimdilik, bastamashyldyq, jaýapkershilik jáne zeıin — bularsyz adam men ıttiń tıimdi tandemi men qyzmettik boryshty oryndaý múmkin emes, — deıdi Kınologııalyq qyzmet ortalyǵynyń basshysy Nııaz Valıev.

Itterdi jattyqtyrý kúndelikti júrgiziledi. Iesiniń árbir qımylyna tórt aıaqty kómekshiler lezde jaýap beredi. Úıretý birneshe kezeńnen turady, nátıjesinde ıtter qajetti daǵdylardy meńgeredi. «Tórt aıaqty polıtseılerdiń» árqaısysynyń óz «mamandyǵy» bar.

Kınologııalyq oqý ortalyǵynda janýarlardy veterınarlar turaqty baqylaýda ustaıdy.

Qyzmetke ıt tańdaýdan buryn, ol belgili talaptar boıynsha baǵalanady. Kınologtar kúndelikti ıttermen jattyǵýlar ótkizip, jalpy úıretý kýrsynan ótip, izdestirý daǵdylarynyń eń qajetti túrlerin úıretedi.

Eske sala keteıik, Abaı oblysynda qyzmettik ıtterdiń kómegimen 28 qylmys ashyldy.